ԵՐԵՎԱՆ, 6 ապրիլի. /Նովոստի-Արմենիա/. ՀՀ կառավարությունը ծրագրում է Հայրենական մեծ մատերազմի վետերաններին «սառեցված» խորհրդային ավանդների համար մոտ 2-2,2 միլիոն դոլարի (800-900 միլիոն դրամ) փոխհատուցում վճարել, երեքշաբթի «Նովոստի-Արմենիա» գործակալությանը ասաց ՀՀ ֆինանսների նախարար Տիգրան Դավթյանը:
Նրա խոսքերով՝ կառավարությունը խորհրդարանի քննարկմանն է ներկայացրել «Հայաստանի 2010 թ.-ի պետբյուջեի մասին» օրենքում նախատեսված փոփոխությունները, համաձայն որոնց՝ կառավարությունը հանդես է գալիս 2010 թ.-ի ընթացքում Հայրենական մեծ պատերազմի վետերանների ավանդների փոխհատուցումն իրականացնելու նախաձեռնությամբ:
«Հայաստանի խորհրդարանում փոփոխությունների ընդունումից հետո կառավարությունը պետք է օպերատիվ կերպով որոշում ընդունի, որը թույլ կտա արդեն մինչև մայիսի 9-ը սկսել փոխհատուցումների վճարման գործընթացը», - ասաց Դավթյանը:
Նա նշեց, որ օրինագծի համաձայն՝ առաջնահերթ կարգ է նախատեսվում Հայրենական մեծ պատերազմի վետերաններին «սառեցված» խորհրդային ավանդների փոխհատուցումների վճարման համար:
Ինչպես նշեց նախարարը, ծրագրվում է, որ խորհրդային ավանդների փոխհատուցումների վճարման գործընթացը կտևի 2010 թվականի ողջ ընթացքում:
«Այսօր Հայաստանում կա շուրջ 3,7 հազար վետերան, որոնց թիվն ամբողջովին ճշտված է», - ասաց Դավթյանը:
Նախարարը նշեց, որ այս նախաձեռնությունը Մեծ հաղթանակի 65-ամյակին նվիրված միջոցառումներից մեկն է:
Միջոցառումների կազմակերպման պետական հանձնաժողովը ծրագրում է այս տարի անցկացնել ինչպես մշակութային, այնպես էլ սոցիալական նախագծեր:
Խորհրդային «սառեցված» ավանդների փոխհատուցումը վճարելու համար 2010 թ.-ին պետբյուջեից հատկացվել է 1,7 միլիարդ դրամ:
ՀՀ կառավարությունը 2006 թ.-ի մարտի 16-ին հաստատել է մինչև 1993 թ.-ի հունիսի 10-ը նախկին ԽՍՀՄ Խնայբանկի հանրապետական բանկում ավանդների փոխհատուցման տրամադրման կարգը, ինչպես նաև դիմումի լրացման կարգը:
Մինչև 1993 թ.-ի հունիսի 10-ը ԽՍՀՄ Խնայբանկում «սառեցված» ավանդների փոխհատուցումները տրամադրվում են միայն այն անձանց, ովքեր 2005 թ.-ի հուլիսի 1-ից մինչև 2006 թ.-ի ապրիլի 1-ը ներառվել են նպաստ ստացող ընտանիքների ցանկերում: Միաժամանակ ավանդները տրվելու են ըստ առաջնահերթության՝ կախված շահառուների՝ սոցիալական առանձին խմբերին պատկանելուց:-0-
