Ադրբեջանը կարող է պատերազմ սկսել հայ-թուրքական արձանագրությունների վավերացման դեպքում, լրագրողներին հայտնեց Հայ Դատի քաղաքական հարցերի կենտրոնական գրասենյակի ղեկավար Կիրո Մանոյանը։
«Ադրբեջանը կարող է պատերազմ ծավալել միայն երկու դեպքում՝ եթե բացարձակապես վստահ լինի իր ռազմական գերազանցության մեջ, ինչը բացառվում է, և այն դեպքում, երբ Թուրքիան նկատի չառնի նրա շահերը և վավերացնի արձանագրությունները»,- ասաց Մանոյանը։
Ըստ նրա, հրավիրելով Հայաստանի նախագահ Սերժ Սարգսյանին և Թուրքիայի վարչապետ Ռեջեփ Թայիփ Էրդողանին մասնակցելու Վաշինգտոնում ապրիլի կեսերին կայանալիք միջուկային անվտանգության գագաթնաժողովին, ԱՄՆ ղեկավարությունը նպատակ ունի կազմակերպել Սարգսյանի և Էրդողանի հանդիպումը։
ՀՅԴ ներկայացուցչի խոսքերով, ԱՄՆ-ն կփորձի այդ հանդիպման ընթացքում համոզել կողմերին վավերացնել արձանագրությունները։
«Թուրքիան փոխարենն ԱՄՆ-ից կպահանջի երաշխքներ, որ ապրիլի 24-ի (Հայոց Ցեղասպանության զոհերի հիշատակի օր) իր ավանդական խոսքում նախագահ Օբաման չի օգտագործի «ցեղասպանություն» բառը»։ Եվ ավելի հավանական է, որ ԱՄՆ-ն կտա այդ երաշխիքները, որովհետև ԱՄՆ-ի համար շատ կարևոր է արձանագրությունների վավերացումը»,- նշեց Մանոյանը։
Հայոց Ցեղասպանությունը ХХ դարի առաջին ցեղասպանությունն է։ Թուրքիան ավանդաբար մերժում է Առաջին համաշխարհային պատերազմի տարիներին մոտ մեկուկես միլիոն հայերի զանգվածային ջարդեր իրականացնելու մեղադրանքները և չափազանց ցավագին է վերաբերվում Հայոց Ցեղասպանության հարցի վերաբերյալ Արևմուտքի կողմից արվող քննադատություններին։
Հայաստանի և Թուրքիայի՝ մինչև վերջին ժամանակները բավականին լարված հարաբերությունները սկսեցին կարգավորվել, երբ երկու երկրի արտգործնախարարներ Էդվարդ Նալբանդյանն ու Ահմեդ Դավութօղլուն հոկտեմբերի 10-ին Ցյուրիխի համալսարանում ստորագրեցին «Դիվանագիտական հարաբերությունների հաստատման մասին արձանագրությունը» և «Երկկողմ հարաբերությունների զարգացման մասին արձանագրությունը»: Փաստաթղթերը ստորագրումից հետո պետք է հավանության արժանանան երկու երկրների խորհրդարանների կողմից:-0-
