Հեռահաղորդակցության միջազգային միության գլխավոր քարտուղարն ապրիլի 6-7-ը պաշտոնական այց կունենա Հայաստան

ԵՐԵՎԱՆ, 2 ապրիլի. /Նովոստի-Արմենիա/. Հեռահաղորդակցության միջազգային միության (International Telecommunication Union, ITU) գլխավոր քարտուղար Համադուն Տուրեն (Hamadoun I. Touré) ապրիլի 6-7-ին պաշտոնական այց կունենա  Հայաստան:

Ինչպես ուրբաթ «Նովոստի-Արմենիա» գործակալությանը տեղեկացրեց ՀՀ տրանսպոտրի և կապի նախարարի մամուլի քարտուղար Սուսաննա Տոնոյանը, ապրիլի 7-ին Համադուն Տուրեն հանդիպումներ կունենա ՀՀ նախագահ Սերժ Սարգսյանի և  ՀՀ վարչապետ Տիգրան Սարգսյանի հետ:

Հանդիպման շրջանակներում Տուրեն հանդիպում կունենա նաև ՀՀ տրանպորտի և կապի նախարար Մանուկ Վարդանյանի հետ, կայցելի Ցեղասպանության թանգարան և Հայ-ռուսական սլավոնական համալսարան:

Հեռահաղորդակցության միջազգային միության գլխավոր քարտուղարի մասնակցությամբ կկազմակերպվի նաև կլոր սեղան` կապի, հեռահաղորդակցության և տեղեկատվական տեխնոլոգիաների ոլորտի ներկայացուցիչների հետ:

ՀՄՄ-ն Միացյալ ազգերի կազմակերպության տեղեկատվական հաղորդակցության առաջատար կազմակերպություն է: Որպես  պետական կառավարման մարմինների և մասնավոր հատվածի կոորդինացման համաշխարհային կենտրոն` այն օժանդակում է ոլորտում համագործակցության եզրերի որոնման գործընթացին: Հիմնադրված լինելով 1865 թ.-ին Փարիզում՝ որպես  Հեռագրային միջազգային միությունը՝  ՀՄՄ-ն իր ներկայիս անվանումը ստացել է 1934 թ.-ին, իսկ 1947 թ.-ին դարձել է ՄԱԿ-ի մասնագիտացված հաստատություն:

ՀՄՄ-ի կազմում ընդգրկված է 191 երկիր և 719 անդամ՝ ըստ հատվածների և ասոցիացիաների (գիտաարդյունաբերական ձեռնարկություններ, կապի պետական և մասնավոր օպերատորներ), ռադիոհեռարձակող ընկերություններ, տարածաշրջանային և միջազգային կազմակերպություններ:

Հայաստանը Հեռահաղորդակցության Միջազգային Միության անդամ-պետություն է  1992թ.-ից: -0-