Հայաստանի նախագահը հայկական անձնագրեր է հանձնել ՀԲԸՄ Հոգաբարձուների խորհրդի անդամին և նրա կնոջը

ԵՐԵՎԱՆ, 1 ապրիլի. /Նովոստի-Արմենիա/. Հայաստանի նախագահ Սերժ Սարգսյանը Հայկական բարեգործական ընդհանուր միության՝ Պերճ Սեդրակյանի գլխավորած պատվիրակության (ՀԲԸՄ)  հետ հանդիպման ընթացքում հայկական անձնագրեր է հանձնել ՀԲԸՄ Հոգաբարձուների խորհրդի անդամ, հայտնի բարերար Նազար Նազարյանին և նրա կնոջը։

Ինչպես «Նովոստի-Արմենիա» գործակալությանը հայտնեցին երկրի ղեկավարի մամուլի ծառայությունից, անվանի բարերարը հուզմունքով նշել է, որ Հայաստանի անկախությունը իր համար երազի նման մի բան է և ինքը ոգևորված է հայրենիք այցելությունից:

Իր հերթին Սարգսյանը, ողջունելով Սփյուռքի իր հայրենակիցներին, գոհունակություն է հայտնել, որ նրանք ամեն անգամ ավելի ու ավելի մեծ կազմով են այցելում Հայաստան:

«Ինչքան դուք ավելի ակտիվ լինեք, դրանից մենք միայն ու միայն ուրախ կլինենք»,- ասել է երկրի ղեկավարը՝ պատրաստակամություն հայտնելով աջակցել ու սատարել նրանց նախաձեռնություններին ու ծրագրերին:

Միաժամանակ Սերժ Սարգսյանը ցանկություն է հայտնել, որ հնարավորինս արագ Երևանի կենտրոնում իր դռները բացի Սփյուռքի առանցքային կառույցներից մեկի` Հայկական բարեգործական ընդհանուր միության գրասենյակը:

ՀԲԸՄ նախագահ Պերճ Սեդրակյանն իր հերթին ասել է, որ ժամանակի ընթացքում Սփյուռքի կազմակերպություններն աստիճանաբար պետք է դառնան հայաստանակենտրոն:

«Որտեղ էլ, որ մենք լինենք, մեր հիմնական տեղն այստեղ է»,-ընդգծել է նա:

Հանրապետության նախագահը և ՀԲԸՄ ներկայացուցիչները խոսել են Սփյուռքի ներուժի պահպանման, մայր հայրենիքի ուժեղացման, ազգային նպատակների շուրջ սփյուռքահայության համախմբման, հայապահպանության խնդիրների մասին:

Նշելով, որ հատկապես վերջին տարիներին Հայաստանի հետ հարաբերություններն ու համագործակցությունը շատ ավելի ջերմ են՝ Բարեգործականի անդամներն ասել են, որ Միությունը շարունակելու է իր աջակցությունը և զորավիգ է լինելու նախագահին ու նրա ազգանվեր ծրագրերին: -0-