Գառնի գյուղի մոտակայքում նկատված տարօրինակ երևույթը կապված չէ երկրաբանական գործոնների հետ. սեյսմոլոգ
Գառնի գյուղի մոտակայքում նկատված տարօրինակ երևույթը, որն ականատեսների կարծիքով ծխոտում է եղել, սեզոնային մակերեսային երևույթ է և կապված չէ երկրաբանական գործոնների հետ, «Նովոստի-Արմենիա» գործակալությանը տված հարցազրույցում տեղեկացրեց ՀՀ ԱԻՆ-ին առընթեր Սեյսմիկ պաշտպանության ազգային ծառայության պետի տեղակալ Հրաչյա Պետրոսյանը:
«Ես ինքս սեյսմիկ պաշտպանության ծառայության աշխատակիցների հետ մեկնել եմ Գառնի: Մենք ուսումնասիրել ենք «ծխոտման» վայրը և եկել ենք այն եզրահանգման, որ այդ երևույթը կապված չէ երկրակեղևի խորը շերտերի հետ: Դա մակերեսային սեզոնային երևույթ է, որը կապված է փշատենիների փոշոտման հետ», - ասաց Պետրոսյանը՝ նշելով, որ, ամենայն հավանականությամբ, հենց դա են նկատել տեղի բնակիչները:
Ծաղկափոշու ամպ է նկատվել Ազատ գետի ստորոտին՝ Գառնի գյուղից դուրս գալու ճանապարհին, որտեղ փշատենիներ են աճում:
Պետրոսյանն ասաց, որ տեղանքում փորձ է անցկացվել. աշխատակիցը թափ է տվել ծառը, ինչի արդյունքում ծաղկափոշի է օդ բարձրացել:
Փորձագետի խոսքերով, որպեսզի երկրաբանական բեկվածքից ինչ-որ գազեր արտազատվեն, պետք է երկրի մակերևույթին ճեղքվածք առաջանա, ինչը պետք է ուղեկցվի երկրաշարժով:
«Այնտեղ ոչ մի երկրաշարժ չի եղել, չի նկատվել բեկվածքի գոյացում և ստորգետնյա գազերը չէին կարող երկրի մակերես բարձրանալ», - տեղեկացրեց Պետրոսյանը:
«Պարզաբանումների համար անհրաժեշտ է դիմել բուսաբաններին, այգեգործներին և անտառագետներին: Նմանատիպ երևույթները մեր մասնագիտական շրջանակներում չեն», - ասաց նա:-0-
