Արժույթի միջազգային հիմնադրամն ավարտել է Stand-By Arrangement (SBA) ծրագրի շրջանակներում Հայաստանի տնտեսական կատարողականի երրորդ զեկույցը և որոշում է ընդունել անհապաղ տրամադրել 485 միլիոն SDR (շուրջ 73,6 միլիոն դոլար), նշում է ԱՄՀ-ի պաշտոնական կայքը:
Այսպիսով, վճարումների ընդհանուր ծավալն այսօրվա դրությամբ կազմում է 350,4 միլիոն SDR (շուրջ 532,2 միլիոն դոլար):
«Հայաստանի կողմից Stand-By Arrangement համաձայնագրի իրականացումը դրական է, թվում է, թե տնտեսական ռեցեսիան նահանջում է՝ աջակցություն ստանալով դրամական և ֆիսկալ քաղաքականության կողմից: Մարտահրավերները դեռ առկա են, անհրաժեշտ է նպաստել փխրուն վերականգնմանը, հաղթահարել արտաքին խոցելիությունը, և կարճ ժամկետներում հասնել հստակ ֆիսկալ համալիր ծրագրի», - ասել է ԱՄՀ-ի տնօրեն-կառավարչի տեղակալ Մուրիլո Պորտուգալը (Murillo Portugal):
«Ֆիսկալ քաղաքականության նպատակն է շարունակել վերականգնմանն ուղղված աջակցությունը՝ 2010 թ.-ին աստիճանաբար սկսելով ֆիսկալ համախմբումը: Սոցիալական ծախսերը պաշտպանված կլինեն: Իշխանությունները հակված են առաջընթաց գրանցել հարկային քաղաքականության և վարչարարության, ինչպես նաև պետական կարիքների համար նախատեսված ծախսերի և պարտքերի վերահսկման ոլորտներում բարեփոխումների իրագործման հարցում», - ասել է Պորտուգալը:
Պահուստային միջոցների մասին 28-ամսյա Stand-By-համաձայնագիրը (Stand-By Arrangement) հաստատվել է 2009 թ.-ի մարտի 6-ին: Ծրագրի հիմնական նպատակն է օգնել Հայաստանին արտաքին ցնցումներին ադապտացվելու գործում, վստահություն ապահովել արտարժույթի և ֆինանսական համակարգի նկատմամբ, պաշտպանել հասարակության անապահով խավերը:-0-
