ԱՄՆ նախագահ Բարաք Օբաման ապրիլի 24-ին հայ ժողովրդին ուղղված իր ավանդական ուղերձում չի արտասանի «ցեղասպանություն» բառը, կարծում է թուրքագետ Ռուբեն Մելքոնյանը:
«Օբաման, ամենայն հավանականությամբ, նախորդ տարվա պես կօգտագործի «մեծ եղեռն» արտահայտությունը»,- երկուշաբթի հրավիրված մամուլի ասուլիսի ժամանակ ասաց Մելքոնյանը:
Հայոց ցեղասպանության զոհերի հիշատակի օրվա՝ ապրիլի 24-ի կապակցությամբ հայ ժողովրդին ուղղված իր ուղերձում ԱՄՆ նախագահ Բարաք Օբաման 2009թ.-ին չօգտագործեց «ցեղասպանություն» բառը՝ այն փոխարինելով «մեծ եղեռն» արտահայտությամբ, ինչպես Հայաստանում անվանում են 1915-1923թթ.-ի ցեղասպանությունը:
Մելքոնյանն այս կապակցությամբ նշեց, որ «Մեծ եղեռն» և «ցեղասպանություն « բառերի մեջ տարբերություն կա:
«Ցեղասպանությունը» իրավաբանական տերմին է, իսկ «Մեծ եղեռն»-ը արտահայտություն, որը ոչ մի իրավաբանական նշանակութուն չունի և միջազգային իրավաբանական տերմինաբանության մեջ ներառված չէ»,- հստակեցրեց նա՝ միաժամանակ ավելացնելով, որ հայերի համար այդ երկու բառերը նույն իմաստային կշիռն ունեն:
Հայոց Ցեղասպանությունը ХХ դարի առաջին ցեղասպանությունն է։ Թուրքիան ավանդաբար մերժում է Առաջին համաշխարհային պատերազմի տարիներին մոտ մեկուկես միլիոն հայերի զանգվածային ջարդեր իրականացնելու մեղադրանքները և չափազանց ցավագին է վերաբերվում Հայոց Ցեղասպանության հարցի վերաբերյալ Արևմուտքի կողմից արվող քննադատություններին։
Հայոց ցեղասպանության փաստը ճանաչել են բազմաթիվ երկրներ, մասնավորապես, Ուրուգվայը, Լիտվան, Ռուսաստանը, Ֆրանսիան, Իտալիայի խորհրդարանի ստորին պալատը, Գերմանիան, Հոլանդիան, Սլովակիան, Շվեդիան, Շվեյցարիան, ԱՄՆ 42 նահանգներ, ինչպես նաև Հունաստանի, Կիպրոսի, Արգենտինայի, Բելգիայի, Ուելսի խորհրդարանները, Կանադայի խորհրդարանի համայնքների պալատը և Լեհաստանի սեյմը, Վատիկանը, Եվրախորհդարանը, Եկեղեցիների համաշխարհային խորհուրդը։
Հայաստանի և Թուրքիայի՝ մինչև վերջին ժամանակները բավականին լարված հարաբերությունները սկսեցին կարգավորվել, երբ երկու երկրի արտգործնախարարներ Էդվարդ Նալբանդյանն ու Ահմեդ Դավութօղլուն հոկտեմբերի 10-ին Ցյուրիխի համալսարանում ստորագրեցին «Դիվանագիտական հարաբերությունների հաստատման մասին արձանագրությունը» և «Երկկողմ հարաբերությունների զարգացման մասին արձանագրությունը»:-0-
