Բացվել է Երևան- Թել Ավիվ-Երևան ավիաչվերթը

Նախօրեին Երևանի «Զվարթնոց» օդանավակայանում տեղի է ունեցել Երևան – Թել Ավիվ – Երևան ավիաչվերթի շնորհանդեսը, հաղորդում է «Արմավիա» ավիաընկերության մամուլի ծառայությունը:

Ինչպես միջոցառման ժամանակ հայտարարեց «Արմավիա» ավիաընկերության նախագահ Միխայիլ Բաղդասարովը, մարտի 28-ին բացված կանոնավոր չվերթը թույլ կտա ակտիվացնել երկու երկրների միջև կապերն ու զգալիորեն կթեթևացնի դեպի Իսրայել ուղևորությունը: Բաղդասարովը հուսով է, որ հետաքրքրությունը երկկողմ կլինի, Հայաստանի պատմամշակութային վայրերը կհետաքրքրեն նաև Իսրայելի քաղաքացիներին:

Ընկերության կոմերցիոն տնօրեն Էդգար Կարապետյանի խոսքերով՝ չվերթն իրականացվելու է շաբաթը երկու անգամ՝ հինգշաբթի և կիրակի օրերին А-320 և А-319 ինքնաթիռներով: Ավիատոմսերի արժեքը երկու ուղղությամբ կազմում է մոտավորապես 350 եվրո: Չվերթի տևողությունը գրեթե 2 ժամ է, ինչը զգալիորեն կրճատում է ուղևորների ժամանակը, ովքեր առաջ ստիպված էին մեկնել Թբիլիսիից:

«Արմավիա»  ավիաընկերության Երևան-Թել Ավիվ ուղղությամբ առաջին չվերթը մեկնել է ավելի քան 60 ուղևորով:-0-