Ռուսաստանի Դաշնությունում ՀՀ դեսպանատան աշխատակիցները չեն տուժել Մոսկվայի մետրոյում տեղի ունեցած պայթյունների հետևանքով, «Նովոստի-Արմենիա» գործակալությանը տեղեկացրեց դեսպանատան մամուլի քարտուղար Գևորգ Մինասյանը:
««Լուբյանկա» կայարանը գտնվում է դեսպանատան կողքին: Բոլոր աշխատակիցներն աշխատավայրում են, և ոչ ոք չի տուժել: Մենք խոսել ենք ՀՀ քաղաքացիների հետ, ովքեր հյուպատոսություն են այցելել առավոտյան 7:30-ից-8:00-ը: Նրանց մոտ էլ ամեն ինչ նորմալ է», - ասաց Մինասյանը:
Նրա խոսքերով՝ մնացած տեղեկատվությունը ճշտում են ռուսական ծառայությունները, և տեղեկություն ստանալու դեպքում ՀՀ դեսպանատունը կտեղեկացնի ՀՀ արտգործնախարարությանը:
Երկուշաբթի առավոտյան մոտավորապես մեկ ժամվա տարբերությամբ Մոսկվայի մետրոպոլիտենի «Լուբյանկա» և «Պարկ Կուլտուրի» կայարաններում տեղի են ունեցել երկու հզոր պայթյուններ: Վերջին տվյալների համաձայն՝ «Լուբյանկա» կայարանում տեղի ունեցած պայթյունի հետևանքով զոհվել է ավելի քան 20 մարդ, մոտավորապես 17-ը վիրավորվել է: «Պարկ Կուլտուրի» կայարանում զոհվել է 12 մարդ, վիրավորվել՝ 15-ը:-0-
