ԵՐԵՎԱՆ, 26 մարտի. /Նովոստի-Արմենիա/. Շենգեն մուտքի արտոնագրի ստացման կարգը կհեշտանա և ավելի թափանցիկ կդառնա, ուրբաթ մամուլի ասուլիսի ժամանակ ասաց Հայաստանում Ֆրանսիայի հյուպատոս Ֆրեդերիկ Գրապինը:
«2010թթ.-ի ապրիլի 5-ից ուժի մեջ կմտնի Եվրահամայնքի մուտքի արտոնագրի մասին նոր օրենսգիրքը, որով կդյուրացվի Շենգեն գոտու համար մուտքի արտոնագիր ստանալու գործընթացը»,- հայտնեց հյուպատոսը:
Նրա խոսքով, օրենսդրության փոփոխության հիմնական նպատակը Շենգեն գոտու բոլոր երկրների դիվանագիտական ներկայացուցչություններում արտոնագիր ստանալու համար հարաբերականորեն նույն գործընթացների ներդրումն է:
Օրինակ, ըստ հյուպատոսի, այսուհետ կվերանա B կարգի տարանցիկ արտոնագրերը, որոնք թույլ էին տալիս որոշակի ժամանակով լքել տարանցիկ երկրի օդանավակայանի տարածքը: Դրանք կփոխարինվեն C կարգի արտոնագրով, որոնք ոչնչով չեն տարբերվում կարճաժամկետ տուրիստական արտոնագրերից:
«Շենգենյան գոտու հյուպատոսության ներկայացուցիչներն այսուհետ իրավունք չունեն 10 տարուց ավելի տարիք ունեցող անձնագրերի մեջ վիզա խփելու»,- ասաց Գրապինը՝ ավելացնելով, որ այդ մասին տեղյակ են պահվել ՀՀ բոլոր համապատասխան պետական կառույցները:
«Անձնագիրը պետք է վիզան խփելու պահից սկսած նվազագույնը ևս 3 ամսվա վավերականություն ունենա», - ասաց նա:
Հյուպատոսն ընդգծեց, որ թափանցիկությունն ապահովելու համար օրենսդրությամբ նախատեսված է, որ ցանկացած մերժման հիմնավորում գրավոր ներկայացվելու է շահագրգիռ և հետաքրքրված մարդկանց:
«Արտոնագիր ստանալու համար դիմած անձն իր հերթին պետք է գրավոր պարտավորություն ստանձնի, որ պատրաստվում է վերադառնալ հայրենիք նշված ժամանակահատվածում: Այն դեպքում, եթե տվյալ անձնը խախտի պարտավորությունը, նա կընդգրկվի անհուսալի անձանց ցուցակում, ինչը հետագայում զգալիորեն կբարդացնի արտոնագիր ստանալը»,- ընդգծեց Գրապինը:
Հյուպատոսն ավելացրեց նաև, որ 2010թ.-ի ապրիլի 5-ից մինչև 2011թ.-ի ապրիլի 5-ը փորձնական շրջան է հայտարարվել, որի ընթացքում օրենսգիրքը կլրամշակվի:
Նա հայտնեց նաև, որ մուտքի արտոնագրի արժեքը փոփոխություն չի ունենա և կմնա 60 եվրոյի մակարդակում:
«Եթե ներկայացված փաստաթղթերը լրիվ են, արտոնագիրը կտրամադրվի երկու օրվա ընթացքում»,- ասաց հյուպատոսը:-0-
