ՀՀ արտգործնախարարությունը Հայոց ցեղասպանության շուրջ Թուրքիայի շահարկումներն անհարիր է համարում, հաղորդում է ՀՀ ԱԳՆ մամուլի ծառայությունը:
«Թե Հայաստանի նախագահը, թե արտգործնախարարը բազմիցս հրապարակայնորեն հայտարարել են, որ Հայաստանը երբևէ հարցականի տակ չի դրել և չի դնելու ոչ Ցեղասպանության փաստը, ոչ էլ դրա միջազգային ճանաչման կարևորությունը: Հայաստանի ԱԳ նախարարն այդ մասին հայտարարել է անգամ 2008 թ. նոյեմբերին Ստամբուլում` Թուրքիայի այն ժամանակվա արտգործնախարար Բաբաջանի հետ հանդիպումից րոպեներ առաջ: Այսօր, այս հարցի շուրջ որևէ շահարկում անհարիր է և անտեղի» - ՀՀ ԱԳՆ մամուլի ծառայությունը մեջբերել է ՀՀ փոխարտգործնախարար Արման Կիրակոսյանի խոսքերը:
Պատասխանելով Թուրքիայի նախկին ԱԳ նախարար Ալի Բաբաջանի հայտարարության մասին հարցին, ըստ որի՝ հայ-թուրքական հարաբերությունների կարգավորման բանակցություններին իր մասնակցությամբ պայմանավորվածություն է ձեռք բերվել ցեղասպանության վերաբերյալ քննարկումների մասին՝ Կիրակոսյանն ասել է, որ «չէր ցանկանա հավատալ, որ Թուրքիայի նախկին արտգործնախարարը այդպիսի բան կարող էր ասել»:
«Սակայն եթե դա իրականություն է, ապա դա առնվազն տարակուսանք է առաջացնում, քանի որ ես ներկա եմ եղել այն հանդիպումներին, որոնց արդյունքում սկսվել և շարունակություն է ստացել հայ-թուրքական կարգավորման գործընթացը, երբ որևիցե պայմանավորվածություն Ցեղասպանության եղելության քննարկման մասին չի եղել», - ասել է Կիրակոսյանը:
Հայաստանի և Թուրքիայի հարաբերությունները բավականին լարված էին մինչև վերջերս, երբ երկու երկրների արտգործնախարարները հոկտեմբերի 10-ին Ցյուրիխի համալսարանում ստորագրեցին «Դիվանագիտական հարաբերությունների հաստատման մասին արձանագրությունը» և «Երկկողմ հարաբերությունների զարգացման մասին արձանագրությունը»: Փաստաթղթերը ստորագրումից հետո պետք է հավանության արժանանան երկու երկրների խորհրդարանների կողմից:
1915 թ.-ի Հայոց ցեղասպանությունը ХХ դարի առաջին ցեղասպանությունն է: Թուրքիան ավանդաբար մերժում է Առաջին համաշխարհային պատերազմի տարիներին մոտ մեկուկես միլիոն հայերի զանգվածային ջարդեր իրականացնելու մեղադրանքները և չափազանց ցավագին է վերաբերվում Հայոց Ցեղասպանության հարցի վերաբերյալ Արևմուտքի կողմից արվող քննադատություններին։ Հայոց ցեղասպանության փաստը ճանաչել են բազմաթիվ երկրներ, մասնավորապես՝ Ուրուգվայը, Ռուսաստանը, Ֆրանսիան, Լիտվան, Իտալիայի խորհրդարանի ստորին պալատը, ԱՄՆ-ի նահանգների մեծամասնությունը:-0-
