Թուրքական մտավորականությունը քննադատում է հայ-թուրքական արձանագրությունների վավերացման ձգձգումը

ԵՐԵՎԱՆ, 25 մարտի. /Նովոստի-Արմենիա/. Թուրքական մտավորականությունը քննադատում է իր կառավարության՝ հայ-թուրքական արձանագրությունների վավերացումը ձգձգող քաղաքականությունը, «Նովոստի-Արմենիա» գործակալությանը հայտարարեց թուրք փորձագետ Սամի Կոհենը (Sami Kohen):

«Կառավարության՝ վավերացումը ձգձգող քաղաքականությունը քննադատության է ենթարկվում մեր երկրում: Ես չեմ խոսում հասարակական կարծիքի մասին, ես նկատի ունեմ մտավորականության՝ գրողների, լրագրողների, ակադեմիկոսների, նախկին դիվանագետների քննադատությունը»,- ասաց Կոհենը: 

Փորձագետը նշեց, որ արձանագրությունների ստորագրումը Ցյուրիխում լավ մեկնարկ էր հարաբերությունների նորմալացման համար:

«Հիմա մենք մի շարք խնդիրներ ունենք, որոնք անհրաժեշտ է հաղթահարել: Դա երկու երկրների շահերից էլ բխում է: Գործընթացը պետք է շահեկան լինի կողմերից երկուսի համար էլ և չպետք է վերածվի «պարտություն-պարտություն» իրավիճակի»,- ասաց Կոհենը՝ ընդգծելով այն բանի կարևորությունը, որ երկու երկրների մտավորականներն էլ չեն հրաժարվել նորմալացման գաղափարից և աշխատել են այդ ուղղությամբ:  

Ըստ նրա՝ Հայաստանի հետ խնդիրներ չունենալը բխում է Թուրքիայի շահերից, ինչն էլ իր հերթին բխում է արտգործնախարար Ահմեդ Դավութօղլուի «զրո խնդիր հարևանների հետ» արտաքին քաղաքական դոկտրինի դրույթից:

«Թուրքիան նաև շահագրգռված է Կովկասում կայունության հաստատմամբ: Բայց մեր տարածաշրջանում կայություն չի լինի այնքան ժամանակ, քանի դեռ չկան նորմալ հարաբերություններ տարածաշրջանի երկրների հետ: Այս համատեքստում պետք է նորմալացվեն նաև Ադրբեջանի ու Հայաստանի միջև հարաբերությունները»,- ասաց Կոհենը:

Փորձագետը նշեց, որ Թուրքիայի որոշ օղակների համար Հայաստանի հետ հարաբերությունների նորմալացումը միջազգային իմիջի խնդիր է: Ըստ նրա՝ տվյալ դիրքորոշման կողմնակիցները կարծում են, որ Հայաստանի և հայկական սփյուռքի հետ հարաբերությունների բարելավումը թույլ կա խուսափել Հայոց ցեղասպանության շուրջ քննադատությունից և պաշտպանվել աշխարհի խորհրդարաններում տվյալ հարցի առնչությամբ բանաձևերի ընդունումից, մասնավորապես, Բուլղարիայի և Իսպանիայի:

Անդրադառնալով 2011 թ.-ին Թուրքիայում կայանալիք խորհրդանարական ընտրությունների թեմային և ազգայնականների հնարավոր իշխանության գալուն՝ Կոհենը նշեց, որ իշխող «Արդարություն և զարգացում» կուսակցությունն ունի եթե ոչ բացարձակ, ապա բավականին մեծ թվով ձայներ ստանալու հնարավորություն: Հետևաբար, քաղաքականության մեջ փոփոխություններ չեն լինի:

Այդուհանդերձ նա հավելեց, որ գաղափարախոսություն ունեցող կուսակցությունները, գալով իշխանության, բախվում են քաղաքական իրականությանն ու ստիպված դառնում պրագմատիկ:

«Չեմ կարծում, որ երկրների միջև սկսվածը կդադարեցվի»,- ասաց Կոհենը: --0--