Անկարային, ըստ ամենայնի, կստիպեն վավերացնել հայ-թուրքական արձանագրությունները, հինգշաբթի ասաց Հայոց ցեղասպանության թանգարան-ինստիտուտ տնօրեն Հայկ Դեմոյանը՝ պատասխանելով «Նովոստի-Արմենիա» գործակալության հարցին փաստաթղթերի հետագա ճակատագրի վերաբերյալ:
Միևնույն ժամանակ փորձագետը կարծում է, որ Թուրքիան, իրավիճակի որոշակի լարումից հետո, կարող է ինքը գալ դրան՝ համեմատելով բոլոր «պլյուսներն» ու «մինուսները»:
Ընդ որում Դեմոյանը նշեց, որ արձանագրությունների վավերացումը հայկական խնդիր չէ և հայկական կողմը այս հարցում ոչինչ չի կորցնում:
«Բժշկական բառապաշարում օգտագործվում է «հիվանդն ավելի շուտ մեռած է, քան ողջ, բայց վերակենդանացումը հնարավոր է» տեմինը: Սա արդեն հայկական խնդիր չէ, քանի որ, մեծ հաշվով, հայկական կողմը ոչնիչ չի կորցնում, իսկ Թուրքիան գլխացավի շատ պատճառներ ունի»,- մեկնաբանեց Դեմոյանը արձանագրությունների վավերացման հետ կապված իրչավիճակը:
Հայաստանի և Թուրքիայի՝ մինչև վերջին ժամանակները բավականին լարված հարաբերությունները սկսեցին կարգավորվել, երբ երկու երկրի արտգործնախարարներ Էդվարդ Նալբանդյանն ու Ահմեդ Դավութօղլուն հոկտեմբերի 10-ին Ցյուրիխի համալսարանում ստորագրեցին «Դիվանագիտական հարաբերությունների հաստատման մասին արձանագրությունը» և «Երկկողմ հարաբերությունների զարգացման մասին արձանագրությունը»: Փաստաթղթերը ստորագրումից հետո պետք է հավանության արժանանան երկու երկրների խորհրդարանների կողմից:
Հայաստանի և Թուրքիայի միջև չկան դիվանագիտական հարաբերություններ, իսկ 1993-ից, պաշտոնական Անկարայի նախաձեռնությամբ, փակ է հայ-թուրքական սահմանը։ Հարաբերությունները բարդացան, երբ Անկարան սկսեց սատարել ադրբեջանական դիրքորոշմանը՝ ղարաբաղյան հարցում, և երբ Թուրքիան կտրուկ արձագանքեց Օսմանյան կայսրությունում 1915թ. հայոց ցեղասպանության միջազգային ճանաչման գործընթացին:-0-
