ՄԱԿ-ը կարևորում է Հայաստանում ազգային փոքրամասնությունների կրթության կազմակերպման խնդիրները

ԵՐԵՎԱՆ, 24 մարտի. /Նովոստի-Արմենիա/. ՄԱԿ-ը կարևորում է Հայաստանում ազգային փոքրամասնությունների կրթության կազմակերպման խնդիրները, չորեքշաբթի ասաց ՄԱԿ-ի հայաստանյան ներկայացուցչության հանրային տեղեկատվության բաժնի ներկայացուցիչ Մարիա Դոցենկոն:

«Չնայած այն փաստին, որ ազգային փոքրամասնությունները Հայաստանում ինտեգրված են թվում, սակայն կան յուրահատուկ խնդիրներ ու հարցեր՝ կապված նրանց լեզվի պահպանման ու նրանց լեզվով կրթություն կազմակերպելու առանձնահատկության, ինչպես նաև ուսուցիչների պատրաստման ու դասագրքերի ապահովման հետ»,- չորեքշաբթի ասաց նա:

Ազգագրագետ Հրանուշ Խառատյանն իր հերթին  նշեց, որ չնայած կառավարության ցուցաբերած  բավական լուրջ աջակցությանը, ամեն դեպքում կրթության խնդիրն, այսպես թե այնպես, առկա է:

Խառատյանը նաև նշեց, որ Հայաստանում ավելի մեծ է ազգային փոքրամասնությունների թիվը, քան ներկայացված վիճակագրական տվյալներում, համաձայն որոնց Հայաստանում 11 ազգային փոքրամասնություն կա:

«Պարզապես Հայաստանում այդ 11 փոքրամասնությունները ինստիտուցիոնալ կերպով են ձևավորվել՝ ստեղծելով սեփական հասարակական կազմակերպությունները: Իմ հաշվարկներով դրանք ավելի շատ են, մոտ վաթսունը»,- ասաց նա:

Խառատյանն այս կապակցությամբ կարևորեց այնպիսի միջոցառումների անցկացումը, որոնք տվյալ խնդիրը հերթական անգամ բարձրաձայնելու ու քննարկելու հնարավորություն են տալիս:

Քննարկումներին մասնակցում էին Հայաստանի ազգային փոքրամասնությունների ռուս, ուկրաինացի, եզդի և հույն երիտասարդ ներկայացուցիչները:-0-