Ադրբեջանին Լեռնային Ղարաբաղի շուրջ գտնվող ազատագրված տարածքների հնարավոր վերադարձի վերաբերյալ ցանկացած հայտարարություն խայտարակում է Հայաստանը, չորեքշաբթի մամուլի ասուլիսում հայտարարեց Հայաստանի Դեմոկրատական կուսակցության առաջնորդ Արամ Սարգսյանը։
«Սերժ Սարգսյանն իրավունք չունի առուծախի առարկա դարձնել մի այլ պետության՝ Լեռնային Ղարաբաղին պատկանող տարածքները։ Առավել ևս, որ Հայաստանը դեռևս չի ճանաչել ԼՂՀ-ն»,- հայտարարեց ՀԴԿ առաջնորդը։
Հայաստանի նախագահ Սերժ Սարգսյանը սիրիական «Al Watan» թերթին տված հարցազրույցում ասել էր, որ Ղարաբաղի շուրջ գտնվող շրջանները Ադրբեջանին վերադարձնելը հնարավոր է միայն այն բանից հետո, երբ նրա ժողովուրդը ինքնորոշման իրավունքի իրական հնարավորություններ ստանա:
ՀԴԿ առաջնորդի խոսքերով՝ Լեռնային Ղարաբաղի Հանրապետության Սահմանադևրությունում ամրագրված է, որ տվյալ տարածքները պատկանում են այդ հանրապետությանը։
«Տարածքների վերադարձի նմանատիպ հայտարարություններով Հայաստանը, փաստորեն, իրեն ագրեսոր է ճանաչում»,- ասաց Սարգսյանը։
Նա ընդգծեց, որ ԼՂՀ ղեկավարությունը պետք է հանդես գա իր դիրքորոշման վերաբերյալ հայտարարությամբ՝ Հայաստանի նախագահի հայտարարությանն ի պատասխան։
Ղարաբաղյան հակամարտությունը սկսվել է 1988 թվականին, երբ գերազանցապես հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին: 1991թ. դեկտեմբերի 10-ին Լեռնային Ղարաբաղում հանրաքվե անցկացվեց, որի ժամանակ մասնակիցների 99,89 տոկոսը քվեարկեց Ադրբեջանից լիովին անկախանալու օգտին:
Դրան հետևեցին Ադրբեջանի ձեռնարկած լայնածավալ ռազմական գործողությունները, որոնք հանգեցրին նրան, որ նրանք կորցրեցին վերահսկողությունը ոչ միայն Լեռնային Ղարաբաղի, այլև հարակից յոթ շրջանների նկատմամբ:
1994թ. մայիսի 12-ին զինադադարի վերաբերյալ եռակողմ համաձայնագրի կնքումից հետո հակամարտության գոտում դադարեցին ռազմական գործողությունները, որոնց արդյունքում երկու կողմից էլ եղավ շուրջ 25-30 հազար զոհ և մոտ մեկ միլիոն մարդ ստիպված լքեց բնօրրանը:
Հրադադարի ռեժիմ հաստատելու վերաբերյալ համաձայնագիրը մինչ այսօր ուժի մեջ է: 1992 թվականից ի վեր հակամարտության խաղաղ կարգավորման ուղղությամբ բանակցություններ են տարվում ԵԱՀԿ Մինսկի խմբի շրջանակներում, որի համանախագահներն են ԱՄՆ-ն, Ռուսաստանը և Ֆրանսիան: -0-
