Հայոց ցեղասպանության փաստը քննարկման ենթակա չէ, հայտարարել է ՀՀ ԱԳՆ ԶԼՄ-ների հետ կապի բաժնի ղեկավար Տիգրան Բալայանը՝ մեկնաբանելով «պատմական հանձնաժողովի» ստեղծման մասին ԱՄՆ Պետքարտուղար Հիլարի Քլինթոնի հայտարարությունը:
«Հայաստանը չի քննարկել և չի քննարկելու Հայոց ցեղասպանության փաստը», - ասել է Բալայանը, հաղորդում է Հայաստանի հանրային հեռուստաընկերությունը:
Նրա խոսքերով՝ հայ-թուրքական հարաբերությունների կարգավորման արձանագրություններում նախատեսված է ենթահանձնաժողովի ստեղծում, որը կզբաղվի երկու երկրների միջև վստահության վերականգնմամբ:
ՌԴ Առաջին ալիքի «Պոզներ» ծրագրում ԱՄՆ պետքարտուղարը հայտարարել է, որ Թուրքիան և Հայաստանը պայմանավորվել են պատմական հանձնաժողովի ստեղծման վերաբերյալ, որը «կզբաղվեր անցյալին վերաբերող բոլոր հարցերով»:
Հայոց Ցեղասպանությունը ХХ դարի առաջին ցեղասպանությունն է։ Թուրքիան ավանդաբար մերժում է Առաջին համաշխարհային պատերազմի տարիներին մոտ մեկուկես միլիոն հայերի զանգվածային ջարդեր իրականացնելու մեղադրանքները և չափազանց ցավագին է վերաբերվում Հայոց Ցեղասպանության հարցի վերաբերյալ Արևմուտքի կողմից արվող քննադատություններին։
Հայոց ցեղասպանության փաստը ճանաչել են բազմաթիվ երկրներ, մասնավորապես, Ուրուգվայը, Լիտվան, Ռուսաստանը, Ֆրանսիան, Իտալիայի խորհրդարանի ստորին պալատը, Գերմանիան, Հոլանդիան, Սլովակիան, Շվեդիան, Շվեյցարիան, ԱՄՆ 42 նահանգներ, ինչպես նաև Հունաստանի, Կիպրոսի, Արգենտինայի, Բելգիայի, Ուելսի խորհրդարանները, Կանադայի խորհրդարանի համայնքների պալատը և Լեհաստանի սեյմը, Վատիկանը, Եվրախորհդարանը, Եկեղեցիների համաշխարհային խորհուրդը։
Հայաստանի և Թուրքիայի արտգործնախարարներ Էդվարդ Նալբանդյանն ու Ահմեդ Դավութօղլուն հոկտեմբերի 10-ին Ցյուրիխի համալսարանում ստորագրեցին «Դիվանագիտական հարաբերությունների հաստատման մասին արձանագրությունը» և «Երկկողմ հարաբերությունների զարգացման մասին արձանագրությունը»: Փաստաթղթերը ստորագրումից հետո պետք է հավանության արժանանան երկու երկրների խորհրդարանների կողմից:
Հայ-թուրքական սահմանը փակ է 1993-ից՝ պաշտոնական Անկարայի նախաձեռնությամբ: Բարդ հարաբերությունները պայմանավորված են, մասնավորապես, Անկարայի կողմից ղարաբաղյան հարցում ադրբեջանական դիրքորոշմանը սատարմամբ, ինչպես նաև Թուրքիայի կտրուկ արձագանքով Օսմանյան կայսրությունում 1915թ. Հայոց ցեղասպանության միջազգային ճանաչման գործընթացին:-0-
