ՀՅԴ-ն պատրաստ է անհրաժեշտության դեպքում իշխանափոխություն և արտահերթ ընտրությունների անցկացում պահանջել

ԵՐԵՎԱՆ, 23 մարտի. /Նովոստի-Արմենիա/. ՀՅԴ-ն պատրաստ է երկրում համապատասխան իրադրության ստեղծման դեպքում իշխանափոխություն և արտահերթ ընտրությունների անցկացում պահանջել, հայտնեց ՀՅԴ Գերագույն մարմնի ներկայացուցիչ, ՀՀ խորհրդարանի արտաքին հարաբերությունների մշտական հանձնաժողովի նախագահ Արմեն Ռուստամյանը:

«Իշխանափոխության և արտահերթ ընտրությունների անցկացման համար անհրաժեշտ է համապատասխան իրավիճակի առկայություն, նման իրավիճակ առայժմ չեմ տեսնում»,- երեքշաբթի մամուլի ասուլիսի ժամանակ ասաց Ռուստամյանը՝ նշելով, որ Դաշնակցությունը որպես լուրջ քաղաքական ուժ պատրաստ է նման վիճակի, եթե անհրաժեշտ պահը գա:

Նրա խոսքերով՝ արտահերթ ընտրությունները տեղի են ունենում այն ժամանակ, երբ երկրում անկառավարելի իրավիճակ է ստեղծվում, և նոր ընտրությունների անցկացումը համարվում է միակ ելքը ստեղծված դրությունից:

«Մենք չենք բացառում նման հեռանկարը, դա հնարավոր է»,- ասաց Ռուստամյանը:

Միևնույն ժամանակ նա հավելեց, որ քաղաքական կուսակցությունը, եթե այն լուրջ ուժ է, պետք է միշտ պատրաստ լինի ցանկացած ժամանակ մասնակցելու ընտրություններին:

«Եթե դեպքերը նման զարգացում ունենան, ապա մենք պատրաստ ենք ցանկացած պահի հանդես գալու կառավարության հրաժարականի և արտահերթ ընտրությունների անցկացման օգտին: Բայց հիմա ես չեմ կարող ասել, որ Հայաստանում այնպիսի իրավիճակ է, որը արտահերթ ընտրություններ է պահանջում, առավել ևս, որ առաջիկա խորհրդարանական ընտրությունները տեղի կունենան երկուսից ավելի տարի հետո»,- ընդգծեց Գերագույն մարմնի ներկայացուցիչը:

ՀՀ խորհրդարանի մշտական հանձնաժողովի ղեկավան ասաց, որ ՀՅԴ-ն մեծ ուշադրություն չի դարձնում արտահերթ ընտրությունների կամ ընդհանրապես ընտրությունների անցկացմանը:

«Մեզ համար ավելի կարևոր է այն, թե կոնկրետ ինչ ծրագրերով են քաղաքական ուժերը ձգտում իշխանության և թե ինչ վստահություն նրանք կարող են ներշնչել հասարակությանը»,- հավաստեց նա: -0-