ՀՀ իշխող կուսակցության փոխնախագահը Ռոբերտ Քոչարյանի՝ իշխանության գալու անհրաժեշտությունը չի տեսնում

ՀՀ երկրորդ նախագահ Ռոբերտ Քոչարյանի՝ իշխանության գալու անհրաժեշտությունը չկա, կարծում է ՀՀ իշխող հանրապետական կուսակցոթւյան փոխնախագահ Ռազմիկ Զոհրաբյանը:

«Երկու տարի առաջ են ընտրություններ եղել, ընտրվել է նոր նախագահ, ձևավորվել է նոր կառավարություն, որոնք կարծես նորմալ են աշխատում են, և նախկին ղեկավարի վերադարձի ի՞նչ անհրաժեշտություն կա»,- Զոհրաբյանը երկուշաբթի հայտարարեց լրագրողներին:

Նա ընդգծեց, որ ՀՀ Հանրապետական կուսակցությունն ու իշխող կոալիցիան բավականաչափ ուժեր ունեն իրենց նախընտրական խոստումներն իրականացնելու համար, և նոր մարդկանց կարիք չկա:

Միևնույն ժամանակ նա չբացառեց, որ եթե անհրաժեշտություն ծագի, իրավիճակը փոխվի, ապա իշխանությունը կդիմի ոչ միայն Ռոբերտ Քոչարյանին, այլև շատ այլ նախկին ղեկավարներին աջակցության խնդրանքով:   

«Եթե նման անհրաժեշտություն լինի, մենք կդիմենք, և պետք չէ անընդհատ կողքից խորհուրդներ տալ, որ Ռոբերտ Քոչարյանը վերադառնա իշխանություն կամ դառնա վարչապետ»,- ասաց Զոհրաբյանը:  

Ընդ որում նա նշեց, որ զարգացած երկրներում տարածված փորձ է, երբ նախկին նախագահներն օգնում են գործող իշխանություններին որոշ արտաքին քաղաքական հարցերում:

Զոհրաբյանը կոչ արեց նաև չհամեմատել Հայաստանն ու Ռուսաստանը, որտեղ նախկին նախագահ Վլադիմիր Պուտինը վարչապետի պաշտոն է զբաղեցնում, և չի բացառվում, որ ապագա ընտրություններից հետո նա նորից նախագահ դառնա:

«Մենք փոքր հանրապետություն ենք, և իմաստ չունի այդքան շուտ-շուտ պաշտոններ փոխել: Բացի այդ ընտրություններից հետո եղան մարտի 1-ի դեպքերը, պետք է դեռ դա մարսել»,- ասաց նա:

ՀՀԿ փոխնախագահը հերքեց նաև իշխող հանրապետական կուսակցության ու մյուս խոշոր կոալիցիոն կուսակցության՝ «Բարգավաճ Հայաստանի» միջև հակամարտությունների մասին լուրերը, որոնք իբր թե պայմանավորված են եղել Ռոբերտ Քոչարյանի՝ իշխանության հնարավոր վերադարձի մասին:   

Նա ընդգծեց, որ ՀՀԿ և «Բարգավաճ հայաստան» կուսակցության միջև նորմալ հարաբերություններ են, իսկ միմյանց հասցեին երբեմն հնչող քննադատությունը նորմալ երևույթ է, և դա չի կարող կոալիցիայի փլուզմանը հանգեցնել: -0-