Սիրիայի Արաբական Հանրապետության նախագահ Բաշար Ալ-Ասադի հրավերով երկուշաբթի պաշտոնական այցով Սիրիա կմեկնի ՀՀ նախագահ Սերժ Սարգսյանը` տիկնոջ Ռիտա Սարգսյանի հետ, հաղորդում է ՀՀ նախագահի մամուլի ծառայությունը:
ՀՀ նախագահի գլխավորած պատվիրակության կազմում են արտաքին գործերի, սփյուռքի, մշակույթի, գյուղատնտեսության նախարարները, պաշտոնատար այլ անձինք:
ՀՀ նախագահի դիմավորման հանդիսավոր արարողությունից հետո տեղի կունենա Հայաստանի և Սիրիայի նախագահներ Սերժ Սարգսյանի ու Բաշար Ալ-Ասադի առանձնազրույցը, որին կհետևի պաշտոնական պատվիրակությունների ընդլայնված կազմով հանդիպումը: Հայաստանի և Սիրիայի ղեկավարները հանդես կգան նաև համատեղ մամուլի ասուլիսով:
Սիրիայի նախագահ Բաշար ալ-Ասադի և տիկին Ասմա ալ-Ասադի անունից` ի պատիվ ՀՀ նախագահ Սերժ Սարգսյանի և տիկին Ռիտա Սարգսյանի, կտրվի պաշտոնական ընթրիք:
Այցի շրջանակում Հայաստանի ղեկավարը հանդիպումներ կունենա նաև Սիրիայի Ժողովրդական ժողովի նախագահի և վարչապետի հետ: ՀՀ նախագահը «Հայ-սիրիական հարաբերությունները» թեմայով դասախոսությամբ հանդես կգա Դամասկոսի համալսարանում:
Սերժ Սարգսյանը կհանդիպի նաև Դամասկոսի հայ համայնքի ներկայացուցիչների հետ, կայցելի քաղաքի պատմամշակութային վայրեր:
Դամասկոսի օպերային թատրոնում Հայաստանի և Սիրիայի առաջին տիկնանց բարձր հովանու ներքո Հայաստանի Ա. Սպենդիարյանի անվան օպերայի և բալետի ազգային ակադեմիական թատրոնը կներկայացնի Արամ Խաչատրյանի «Սպարտակ» բալետը:
Հայաստանի նախագահը այցի շրջանակում կլինի նաև Հալեպում և Դեյր Զորում, հանդիպումներ կունենա տեղական իշխանությունների ղեկավարների և Հալեպի ու Դեյր-Զորի հայ համայնքի ներկայացուցիչների հետ:-0-
