ԵՐԵՎԱՆ, 19 մարտի. /Նովոստի-Արմենիա/. Դեղերի պիտանելիության փոփոխմամբ, ինչպես նաև դեղերի կեղծմամբ և վաճառքով զբաղվող անձանց գործունեություն է բացահայտվել և կասեցվել ՀՀ ԱԱԾ մարմինների կողմից իրականացված օպերատիվ-հետախուզական միջոցառումների արդյունքում։
Ինչպես «Նովոստի-Արմենիա» գործակալությանը հայտնեցին ԱԱԾ մամուլի ծառայությունից, անցկացրած միջոցառումների ընթացքում պարզվել է, որ Երևան քաղաքի բնակիչ Տիգրան Ավետիսյանն իր ծանոթների միջոցով դեղատնից ձեռք է բերել ժամկետանց, ինչպես նաև ժամկետը սպառվող զգալի քանակությամբ դեղեր և հատուկ գործիքներով, համակարգչային տեխնիկայի կիրառմամբ, իրականացրել է դրանց պիտանելիության ժամկետի կեղծում։
«Առանձին դեպքերում Տ.Ավետիսյանն էժանագին դեղերի վրա փակցրել է կեղծ պիտակներ և այլ դեղերի անվան տակ դրանք մի քանի անգամ թանկ գնով վաճառել»,- ասվում է հաղորդագրության մեջ։
Մամուլի կենտրոնից հայտնեցին, որ Ավետիսյանն իր հանցավոր գործունեության մեջ է ներգրավել Երևան քաղաքի բնակիչներ Մկրտիչ Մխիթարյանին և Մինաս Պետրոսյանին, ում աջակցությամբ մի շարք դեղատներ է հանձնել խոշոր չափերի հասնող ժամկետանց և կեղծ դեղեր։
Հաղորդագրության համաձայն, դեղատներում առկա կեղծ և կեղծված պիտանելության ժամկենտներով դեղերն առգրավվել են։ Ավետիսյանի տանից հայտնաբերվել և առգրավվել է ժամկետանց դեղերի մեծ տեսականի, տարբեր դեղերի նոր պիտակներ և ժամկետների կեղծման նպատակով օգտագործվող պարագաներ։
«Նման հանցագործության կատարումը հնարավոր է դարձել դեղատների կողմից «Դեղերի մասին» ՀՀ օրենքի և դեղերի շրջանառությանն առնչվող գործող կարգերի պահանջների կոպիտ խախտումներ թույլ տալու արդյունքում»,- նշվում է հաղորդագրության մեջ։
Փաստի առթիվ հարուցված քրեական գործի նախաքննությունը կատարում է ՀՀ ԱԱԾ Քննչական վարչությունը։ -0-
