Թուրքիան ցայտնոտի մեջ է Հայաստանի հետ հարաբերությունների կարգավորման հարցում, ուրբաթ լրագրողներին հայտնեց ՀՀԿ խորհրդարանական խմբակցության ղեկավար Գալուստ Սահակյանը:
«Վավերացման գործընթացի խելամիտ ժամկետներն անցան: Թուրքիան ցայտնոտի մեջ է ընկել, նա աշխարհը լցրել է անհետևողական հայտարարություններով: Նա նաև իր ներքին խնդիրներն ունի՝ կապված քրդական հարցի ու երկրում իշխանափոխության հետ»,- հայտարարեց Սահակյանը՝ ընդգծելով, որ Հայաստանն այս պահին ավելի շահեկան դիրքում է գտնվում:
Նա նշեց, որ Հայաստանի դիրքերն ուժեղ են, և որքան էլ Թուրքիան չցանկանա կապել հարաբերությունների կարգավորումը ղարաբաղյան հակամարտությանն ու ցեղասպանության հարցին, դա նրանց չի հաջողվի:
Միաժամանակ նա նշեց, որ Հայաստանը չի խուսափի միջազգային որոշակի ճնշումից:
Նրա խոսքով, արձանագրություններից տակ դրված ստորագրությունը ետ կանչելով՝ Հայաստանը ոչինչ չի կորցնի, սակայն, այնուամենայնիվ, դա ինքնանպատակ չէ:
Սահակյանը նկատեց, որ Հայաստանը Թուրքիայի հետ հարաբերությունների կարգավորման գործընթաց է մտել՝ ղեկավարվելով ողջ աշխարհում ընդունված մոդելով, համաձայն որի փակ սահմաններ չպետք է լինեն:
Էդվարդ Նալբանդյանն ու Ահմեդ Դավութօղլուն հոկտեմբերի 10-ին Ցյուրիխի համալսարանում ստորագրեցին «Դիվանագիտական հարաբերությունների հաստատման մասին արձանագրությունը» և «Երկկողմ հարաբերությունների զարգացման մասին արձանագրությունը»: Փաստաթղթերը ստորագրումից հետո պետք է հավանության արժանանան երկու երկրների խորհրդարանների կողմից:
Հայաստանի և Թուրքիայի միջև չկան դիվանագիտական հարաբերություններ, իսկ 1993-ից, պաշտոնական Անկարայի նախաձեռնությամբ, փակ է հայ-թուրքական սահմանը։ Հարաբերությունները բարդացան, երբ Անկարան սկսեց սատարել ադրբեջանական դիրքորոշմանը՝ ղարաբաղյան հարցում, և երբ Թուրքիան կտրուկ արձագանքեց Օսմանյան կայսրությունում 1915թ. հայոց ցեղասպանության միջազգային ճանաչման գործընթացին:-0-
