Հայաստանի ԱՕԿ-ը պաշտոնապես հայտարարել է Բաքվում կայանալիք ըմբշամարտի Եվրոպայի առաջնությանը մասնակցելուց հրաժարվելու մասին

Հայաստանի հունահռոմեական ըմբշամարտի հավաքականը չի մասնակցի ապրիլի 13-18-ը Բաքվում կայանալիք Եվրոպայի առաջնությանը, քանի որ այն վարկանիշային չէ, հաղորդում է «ՌԻԱ Նովոստին»՝ հղում անելով Հայաստանի Ազգային օլիմպիական կոմիտեի մամուլի ծառայությանը: 

«Երևանում Աշխարհի գավաթի ժամանակ հաջող ելույթից հետո Հայաստանը պատրաստվում է Աշխարհի առաջնությանը, որը տեղի կունենա Մոսկվայում և վարկանիշային կլինի: Օլիմպիական կոմիտեի ռազմավարությունը վարկանիշային առաջնություններում արժանի ելույթ ունենալն է, որը թույլ կտա մեծ թվով մարզիկների մասնակցել Օլիմպիական խաղերին»,- ասվում է հաղորդագրության մեջ:

Միաժամանակ, ինչպես նշվում է հաղորդագրության մեջ, Հայաստանի բռնցքամարտի պատանեկան հավաքականը ապրիլի 23-ից մինչև մայիսի 1-ը կմասնակցի Բաքվում կայանալիք առաջնությանը, քանի որ այն վարկանիշային է: Այնտեղ կխաղարկվեն Սինգապուրի Օլիմպիական խաղերի ուղեգրերը:

Հայաստանի հունահռոմեական ըմբշամարտի հավաքականի գլխավոր մարզիչ Լևոն Ջուլֆալակյանը նախօրեին հայտնեց, որ հայկական հավաքականը չի մեկնի Բաքու, քանի Հայաստանի ԱՕԿ-ը նախընտրեց, որպեսզի մարզիկներն ավելի լավ պատրաստվեն աշխարհի առաջնությանը, որը տեղի կունենա Մոսկվայում սեպտեմբերի 6-12-ը:

Ջուլֆալակյանի խոսքերով՝ տվյալ պահին ազգային թիմը ուսումնամարզական հավաք է անցկացնում Երևանում, որը կավարտվի մարտի 20-ին: Եվս մեկ հավաք կանցկացվի մարտի 31-ից մինչև ապրիլի 14-ը Ծաղկաձորում, իսկ հունիսի 3-6-ը հավաքականը կմասնակցի Թբիլիսիում անցկացվելիք միջազգային առաջնությանը:

Փետրվարին Երևանում անցկացվեց հունահռոմեական ըմբշամարտի Աշխարհի առաջնությունը, որին չմասնակցեց Ադրբեջանի հավաքականը: Այդ երկրի ըմբշամարտի ֆեդերացիան իր հրաժարականը բացատրեց Բաքվի Եվրոպայի առաջնությանը նախապատրաստությամբ:

Նախկինում Հայաստանի Ազգային օլիմպիական կոմիտեի փոխնախագահ Ռազմիկ Ստեփանյանը հայտնել էր, որ Հայաստանի ըմբշամարտի հավաքականի՝ 2007թ. Բաքվում կայացած աշխարհի առաջնությանը մասնակցելուց հետո «սառույցը շարժվել» է, և այսօր երկու երկրների օլիմպիական կոմիտեների միջև խնդիրներ չկան, իսկ նրանց հարաբերությունները կառուցվում են օլիմպիական սկզբունքների հիման վրա: --0--