«Օրինաց երկիր» կոալիցիոն խմբակցությունն առաջարկել է կառավարությանը Մեծ հաղթանակի հոբելյանի կապակցությամբ 3,7 հազար հայ վետերանների փոխհատուցել ԽՍՀՄ Խնայբանկերում սառեցված խորհրդային ավանդները:
Ինչպես հայտնեց «Օրինաց երկիր» խմբակցության անդամ Հովհաննես Մարգարյանը, շուրջ մեկ ամիս առաջ խմբակցությունը դիմել էր կառավարությանը համապատասխան հայցով և խնդրել Մեծ հաղթանակի 65-ամյակի կապակցությամբ հստակեցնել Հայրենական մեծ պատերազմի՝ Հայաստանում ապրող վետերանների թիվը:
«ՀՀ կառավարության պատասխանում հայտնվում է, որ Հայաստանում այս տարվա տվյալներով ապրում է ավելի քան 3,9 հազար պատերազմի վետերան և նրանց հավասարեցված անձինք, որից 3,7 հազարը չեն օգտվել խորհրդային սառեցված ավանդների փոխհատուցում ստանալու հնարավորությունից»,- հայտնեց Մարգարյանը:
Նրա խոսքերով՝ խմբակցությունն առաջարկել է կառավարությանը որպես բացառություն և Մեծ հաղթանակի առաջիկա հոբելյանի կապակցությամբ փոխհատուցում չստացած վետերաններին իրենց հասանելիք վճարումներն ստանալու արտոնյալ իրավունք տալ:
«Կառավարությունը պատասխանել է, որ դեմ չէ մեր առաջարկությանը»,- նշեց պատգամավորը:
Մարգարյանը հիշեցրեց, որ «սառեցված» խորհրդային ավանդների փոխհատուցման վճարմանը 2010 թ.-ին պետբյուջեից կուղղվի 1,7 մլրդ դրամ (4.2 մլն ԱՄՆ դոլար): Կատարված նախնական հաշվարկների համաձայն, ինչպես հայտնեց խորհրդարանականը, վետերանների վճարումների համար կպահանջվի շուրջ 8-9 մլն դրամ, իսկ խատերազմի յուրաքանչյուր մասնակցի փոխհատուցման չափը շուրջ 250 հազ դրամ կլինի (շուրջ 630 ԱՄն դոլար):
Իր հերթին ՀՀ աշխատանքի և սոցիալական հարցերի փոխնախարար Արտեմ Ասատրյանը հայտնեց, որ խորհդրային ավանդների փոխհատուցումները ստանալու համար հաշվառման են վերցվել շուրջ 63 հազ քաղաքացիներ, որոնք ավելի քան 138 հազար խնայգրքույկ ունեն: Փոխնախարարի տվյալներով՝ ավելի քան 29 հազար քաղաքացիներ արդեն ստացել են փոխհատուցում, և վճարումների գործընթացը հերթականության կարգով շարունակվում է:
Ասատրյանը նշեց, որ ներկայումս արդեն կա երկրի կառավարության հանձնարարականը՝ մշակել համապատասխան օրինագիծ, որը կկանոնակարգի վետերանների վճարումների կարգը:
«Քանի որ ներկայումս մենք հստակ տվյալներ չունենք վետերանների խնայգրքույկների քանակի մասին, բերված թվերը բավականին նախնական են»,- նշեց նա:
Ինչպես տեղեկացրեց Ասատրյանը, պետք է լուծվի նաև վետերաններին վճարումների ֆինանսավորման աղբյուրների հարցը, այսինքն՝ փոխհատուցումների վճարումները կիրականացվեն 2010 թ.-ի համար հատկացված 1,7 մլրդ դրամի հաշվի՞ն, թե՞ վետերանների վճարումների համար կհատկացվեն լրացուցիչ միջոցներ: -0-
