Հայ խորհրդարանականները խստացրել են լրագրողների մասնագիտական գործունեությունը խոչընդոտելու համար նախատեսված պատժամիջոցները

ՀՀ խորհրդարանի պատգամավորները չորեքշաբթի նիստի ժամանակ երկրորդ և վերջնական ընթերցմամբ փոփոխություններ են կատարել ՀՀ քրեական օրենսգրքում, որոնք ուղղված են լրագրողների շահերի պաշտպանությանը:

Ինչպես տեղեկացրեց օրինագծի հեղինակներից մեկը՝ պատգամավոր Հովհաննես Մարգարյանը, փոփոխություններով նախատեսվում է նոր կետերով համալրել ՀՀ ՔՕ 164-րդ հոդվածը (Լրագրողի մասնագիտական օրինական գործունեությանը խոչընդոտելը):

Ինչպես նշեց Մարգարյանը, նոր կետերով սահմանվում է լրագրողի մասնագիտական օրինական գործունեությանը խոչընդոտելու նպատակով, տեղեկատվություն տրամադրելուն կամ չտրամադրելուն հարկադրելու համար  լրագրողի կամ նրա ընտանիքի անդամի նկատմամբ բռնություն գործադրելու և բռնության սպառնալիքի համար պատասխանատվությունը:

Առաջարկվում է նման գործողությունների համար պատժել 200 հազար դրամից (շուրջ 520 դոլար) մինչև 400 հազար դրամ (շուրջ 1035 դոլար) տուգանքով, կամ մինչև երկու տարի ուղղիչ աշխատանքներով կամ մինչև հինգ տարի ազատազրկմամբ:

Միաժամանակ Մարգարյանն ասաց, որ նման փոփոխությունների անհրաժեշտությունը հասունացել է, քանի որ Հայաստանի մի շարք հասարակական կազմակերպությունների համաձայն, վերջին տարիներին ավելացել են լրագրողների նկատմամբ բռնության դեպքերն ու նրանց մասնագիտական գործողություններին խոչընդոտելու փորձերը:

Պատգամավորի խոսքերով, դա ապացուցում է, որ լրագրողների իրավունքների և շահերի պաշտպանության աստիճանը դեռ պատշաճ մակարդակի վրա չէ, և հասունացել է պատժամիջոցների խստացման միջոցով դրանց պաշտպանության անհրաժեշտությունը:

«Հետաքննող լրագրողներ» հասարակական կազմակերպության տվյալներով, Հայաստանում ավելանում է լրագրողների և ԶԼՄ-ների նկատմամբ ֆիզիկական բռնության դեպքերի և սպառնալիքների թիվը:

2010 թ.-ի երկու ամսվա ընթացքում աշխարհում արդեն սպանվել է չորս և ձերբակալվել 190 լրագրող:-0-