ԵՐԵՎԱՆ, 16 մարտի. /Նովոստի-Արմենիա/. «Օրինաց երկիր» կուսակցության երկու նախարարների փոփոխությունը պայմանավորված է ներկուսակցական բարեփոխումներով, երեքշաբթի լարգրողներին հայտնեց «Օրինաց երկիր» կուսակցության նախագահ, Հայաստանի ազգային անվտանգության խորհրդի քարտուղար Արթուր Բաղդասարյանը։
«Կուսակցությունում մեկնարկել է ներկուսակցական քաղաքական բարեփոխումների լուրջ գործընթացը։ Եվ մենք ցանկանում ենք, որպեսզի ներկուսակցական գործերով զբաղվեն փորձառու մարդիկ»,- ասաց նա։
Բաղդասարյանի խոսքերով՝ արտակարգ իրավիճակների նախարարի պաշտոնը զբաղեցրած Մհեր Շահգելդյանը, միաժամանակ լինելով կուսակցության նախագահի տեղակալ, կզբաղվի քաղաքական և գաղափարախոսական հարցերով և բարեփոխումներով՝ «դրանք հասարակությանն ավելի հասանելի դարձնելու նպատակով», իսկ տրանսպորտի և կապի նախկին նախարար Գուրգեն Սարգսյանը կզբաղվի «Օրինաց երկիրի» տնտեսական դաշինքի համակարգմամբ։
«Մեր կուսակցությունը լուրջ տնտեսական ծրագրեր ունի, որոնք պետք է ներկայացնել ինչպես կառավարությանն, այնպես էլ մեր հանրությանը»,- ասաց նա։
Բաղդասարյանն ավելացրեց, որ նախարարների հետ կանչելը ներկուսակցական աշխատանքի բարելավման նպատակով նորմալ գործընթաց է, և որ մյուս կուսակցությունները, մասնավորապես, Դաշնակցությունը կոալիցիայում աշխատելու ժամանակ հաճախ օգտագործում էին այդ հնարքը։
Միաժամանակ նա ընդգծեց, որ կուսակցությունը չի պատրաստվում հետ կանչել իր երրորդ նախարարին՝ գյուղատնտեսության նախարար Գերասիմ Ալավերդյանին, և որ նա ունի «Օրինաց երկրի» աջակցությունը։
Բաղդասարյանն անհեթեթ համարեց նաև լուրերն այն մասին, թե նոր նշանակումները պարտադրվելլ են «Օրինաց երկրին» նախագահի կողմից՝ հավելելով, որ նախարարների թեկնածության համաձայնեցումը նախագահի հետ նորմալ երևույթ է թիմային աշատանքում։
Նա նշեց, որ վաղուց է ծանոթ Մանուկ Վարդանյանի և Արմեն Երիցյանի հետ, և վստահություն հայտնեց, որ «նրանք գերազանց կկատարեն իրենց առջև դրված աշխատանքը և կլինեն «Օրինաց երկրի» հավատարիմ անդամներ»։ -0-
