Թուրքիան ջանք չի խնայում նախապայմաններ առաջադրելու, հայ-թուրքական հարաբերությունների կարգավորման ճանապարհին դժվարություններ և խոչընդոտներ ստեղծելու համար. ՀՀ ԱԳՆ

ԵՐԵՎԱՆ, 16 մարտի. /Նովոստի-Արմենիա/. Թուրքիան ջանք չի խնայում նախապայմաններ առաջադրելու, հայ-թուրքական հարաբերությունների կարգավորման ճանապարհին դժվարություններ և խոչընդոտներ ստեղծելու համար, ասել է ՀՀ ԱԳ նախարար Էդվարդ Նալբանդյանը՝ նախօրեին ելույթ ունենալով Գերմանիայի Արտաքին քաղաքականության խորհրդում:

Նալբանդյանը նախօրեին մեկօրյա պաշտոնական այցով եղել է Բեռլինում, ինչից հետո աշխատանքային այցով մեկնել է Փարիզ:

Ինչպես երեքշաբթի «Նովոստի-Արմենիա» գործակալությանը տեղեկացրեցին ՀՀ ԱԳՆ մամուլի ծառայությունից, Նալբանդյանն ասել է, որ «այսօր Թուրքիայի կողմից հնչող անհիմն պնդումները, որ ԱՄՆ Ներկայացուցիչների պալատում, Շվեդիայի խորհրդարանում կամ այլուր քննարկվող և ընդունվող Հայոց ցեղասպանության մասին բանաձևերը կարող են իբրև թե վնաս հասցնել հայ-թուրքական հարաբերությունների կարգավորման գործընթացին, ընդամենը շղարշ են»:

«Իրականում հենց Թուրքիան ջանք չի խնայում նախապայմաններ առաջադրելու, կարգավորման ճանապարհին դժվարություններ և խոչընդոտներ ստեղծելու համար` դրանով իսկ հարցականի տակ դնելով ողջամիտ ժամկետներ հասկացության անգամ իմաստը», - ասել է Նալբանդյանը:

Նախարարը հույս է հայտնել, որ Թուրքիան կգիտակցի իր ներկայիս գործելաոճի հետևանքների պատասխանատվության ծանրությունը և հուսախաբ չի անի միջազգային հանրությանը:

Հայաստանի ու Թուրքիայի արտգործնախարարները հոկտեմբերի 10-ին Ցյուրիխի համալսարանում ստորագրեցին «Դիվանագիտական հարաբերությունների հաստատման մասին արձանագրությունը» և «Երկկողմ հարաբերությունների զարգացման մասին արձանագրությունը»: Փաստաթղթերը ստորագրումից հետո պետք է հավանության արժանանան երկու երկրների խորհրդարանների կողմից: Այս պահին փաստաթղթերը Հայաստանում և Թուրքիայում վավերացման են ներկայացված :

Հայաստանի և Թուրքիայի միջև չկան դիվանագիտական հարաբերություններ, իսկ 1993-ից, պաշտոնական Անկարայի նախաձեռնությամբ, փակ է հայ-թուրքական սահմանը։

Երկու երկրների միջև բարդ հարաբերությունները պայմանավորված են մի շարք հանգամանքներով, որոնք կապված են, մասնավորապես, Անկարայի՝ ադրբեջանական դիրքորոշման պաշտպանությամբ ղարաբաղյան հարցում, ինչպես նաև Թուրքիայի սուր արձագանքի հետ 1915 թվականին Օսմանյան կայսրությունում Հայոց ցեղասպանության միջազգային ճանաչման հետ կապված։ -0-