ԵԱՀԿ երևանյան գրասենյակի ղեկավարը քիչ հավանական է համարում ԵԱՀԿ ՄԽ գործող ձևաչափի փոփոխությունը

Ղարաբաղյան կարգավորման ԵԱՀԿ Մինսկի խմբի գործող ձևաչափի փոփոխությունը քիչ հավանական է, երկուշաբթի լրագրողներին ասաց ԵԱՀԿ երևանյան գրասենյակի ղեկավար, դեսպան Սերգեյ Կապինոսը։ «Ամենավտանգավորը բանակցային գործընթացի համար կայացած ձևաչափերի կոտրումն է»,- ասաց Կապինոսը՝ նշելով, որ դա կարող է հանգեցնել բանակցային գործընթացի անկանխատեսելի շրջադարձերի։

Ըստ նրա՝ ԵԱՀԿ ՄԽ գործող ձևաչափը բավականին հավասարակշռված և օպտիմալ է։ «ԵԱՀԿ Մինսկի խմբում ներկայացված են միջազգային ասպարեզի երեք առաջատար քաղաքական խաղացողներ՝ Ռուսաստանը, ԵՄ-ն՝ ի դեմս Ֆրանսիայի, և ԱՄՆ-ն։ Սրանք այն պետություններն են, որոնք ունեն իրենց շահերը տարածաշրջանում և անտարբեր չեն այստեղ առկա խնդիրներին»,- պարզաբանեց Կապինոսը՝ նշելով, որ համանախագահների խումբը հաստատել է իր արդյունավետությունը։

«Գոնե երեք անգամ ԵԱՀԿ ՄԽ ջանքերով կողմերը խնդրի կարգավորման սկզբունքների վերաբերյալ համաձայնագրի ստորագրման շեմին են եղել»,- ասաց նա։

Դեսպանի խոսքերով՝ ներկայումս բանակցությունների շատ պատասխանատու փուլ է՝ կապված ԵԱՀԿ ՄԽ կողմից ներկայացված թարմացված մադրիդյան սկզբունքների հետ, և «հարկ է ուշադիր հետևել գործընթացի հետագա զարգացմանը»։

Ղարաբաղյան հակամարտությունը սկիզբ է առել 1988 թ.-ին, երբ հիմնականում հայերով բնակեցված Լեռնային Ղարաբաղը հայտարարեց Ադրբեջանի կազմից  դուրս գալու մասին։

1991 թ. դեկտեմբերի 10-ին, Խորհրդային Միության փլուզումից մի քանի օր առաջ, Լեռնային Ղարաբաղում տեղի ունեցավ հանրաքվե, որի ժամանակ բնակչության ճնշող մեծամասնությունը՝ 99,89 տոկոսը Ադրբեջանից ամբողջովին անկախանալու կողմ քվեարկեց։

Դրանից հետո սկսվեցին լայնամասշտաբ ռազմական գործողություններ, որոնց հետևանքով Ադրբեջանը կորցրեց վերահսկողությունը Լեռնային Ղարաբաղի և նրան հարակից յոթ շրջանների նկատմամբ։

1994 թ.-ի մայիսի 12-ին՝ զինադադարի մասին համաձայնագրի ուժի մեջ մտնելուց հետո հակամարտության գոտում դադարեցին ռազմական գործողությունները։ Պատերազմի  հետևանքով երկու կողմից զոհվեց մոտավորապես 25-30 հազ մարդ և մոտ  մեկ միլիոնը ստիպված եղավ լքել  բնակավայրերը։

Զինադադարի ռեժիմի մասին համաձայնությունը պահպանվում է մինչ այժմ։

1992 թ.-ից մինչ օրս ընթանում են բանակցություններ հակամարտության խաղաղ կարգավորման ուղղությամբ ԵԱՀԿ Մինսկի խմբի շրջանակներում, որի համանախագահներն են ԱՄՆ-ն, Ռուսաստանը և Ֆրանսիան։-0-