ԵՐԵՎԱՆ, 15 մարտի. /Նովոստի-Արմենիա/. Ռուսաստանն ու ԱՄՆ-ն միասին են գործում հայ-թուրքական հարաբերությունների կարգավորման հարցում, կարծում է Կովկասի ինստիտուտի տնօրեն Ալեքսանդր Իսկանդարյանը:
«Այստեղ Վաշինգտոնը մտրակն է, իսկ Ռուսաստանը՝ քաղցրաբլիթը: Եվ այն քաղցրաբլիթները, որոնք Մոսկվան պետք է տար, արդեն տվել է: Ինձ համար դժվար է պատկերացնել, թե Ռուսաստանը էլ ինչ կարող է անել, այժմ կարևոր է Վաշինգտոնի ճնշումը», - երկուշաբթի լրագրողներին հայտարարեց նա:
Իսկանդարյանի խոսքերով՝ Ռուսաստանի կողմից Թուրքիայի համար քաղցրաբլիթ է այն, որ նա վերածվել է արևելքից արևմուտք էներգահոսքերի հատման հանգույցի:
Փորձագետը ընդգծեց, որ եթե Ռուսաստանը դեմ լիներ հայ-թուրքական գործընթացին, ապա այն ընդհանրապես չէր լինի, և որ Ռուսաստանի որոշումը կարող է շրջել ողջ գործընթացը:
Իսկանդարյանն ավելացրեց, որ այս գործընթացը սկսելու Ռուսաստանի համաձայնության պատճառը 2008 թ.-ին Վրաստանի հետ հինգօրյա պատերազմն էր և դրանից հետո ձևավորված իրավիճակը: Իսկանդարյանը հիմքեր չի տեսնում այն բանի համար, որ Ռուսաստանը մոտ ժամանակներս փոխի այդ հարցի շուրջ ունեցած իր դիրքորոշումը:
Նա նաև նշեց, որ քաղաքագետ աշխատելու 20 տարվա ընթացքում չի հիշում մի դեպք, որ Ռուսաստանը, Եվրոպան և ԱՄՆ-ն միասին որևէ հարցի շուրջ նման ձևով հարթ աշխատեն:
Էդվարդ Նալբանդյանն ու Ահմեդ Դավութօղլուն հոկտեմբերի 10-ին Ցյուրիխի համալսարանում ստորագրեցին «Դիվանագիտական հարաբերությունների հաստատման մասին արձանագրությունը» և «Երկկողմ հարաբերությունների զարգացման մասին արձանագրությունը»: Փաստաթղթերը ստորագրումից հետո պետք է հավանության արժանանան երկու երկրների խորհրդարանների կողմից:
Հայաստանի և Թուրքիայի միջև չկան դիվանագիտական հարաբերություններ, իսկ 1993-ից, պաշտոնական Անկարայի նախաձեռնությամբ, փակ է հայ-թուրքական սահմանը։ Հարաբերությունները բարդացան, երբ Անկարան սկսեց սատարել ադրբեջանական դիրքորոշմանը՝ ղարաբաղյան հարցում, և երբ Թուրքիան կտրուկ արձագանքեց Օսմանյան կայսրությունում 1915թ. հայոց ցեղասպանության միջազգային ճանաչման գործընթացին:-0-
