ԵՐԵՎԱՆ, 15 մարտի. /Նովոստի-Արմենիա/. Թուրքիան անլուրջ է վերաբերվում իր կողմից ստորագրված հայ-թուրքական արձանագրություններին, կարծում է ՀՀ ԱԺ խոսնակ Հովիկ Աբրահամյանը:
«Եթե Թուրքիայի իշխանությունները արձանագրությունները ստորագրել են առանց նախապայմանների, իսկ այնուհետև չեն վավերացնում դրանք, հանդես են գալիս արձանագրություններին հակասող հայտարարություններով, ապա ես չեմ կարող դրան լուրջ վերաբերվել: Կարծում եմ, որ թուրքական կողմն անլուրջ է վերաբերվում իր կողմից ստորագրված արձանագրություններին», - ասել է Աբրահամյանը:
Նրա խոսքերով, «չի կարելի ապտակ համարել թուրքական կողմի վերջին հայտարարությունները, քանի որ դրանք լուրջ չեն»:
Աբրահամյանը հիշեցրել է, որ ավելի վաղ Հայաստանի խորհրդարանը գործադիր իշխանությանը լիազորություններ է տվել արձանագրությունների տակ դրված ստորագրությունները ետ կանչելու համար և այժմ այդ հարցի լուծումը գտնվում է նախագահի և ԱԳՆ-ի իրավասության տակ, որոնք պատասխանատու են Հայաստանի արտաքին-քաղաքական ուղղվածության համար:
Միաժամանակ Աբրահամյանը նշել է, որ հայ-թուրքական արձանագրությունների հարցը քննարկվել է կոալիցիոն կուսակցությունների կողմից, և թուրքական կողմի վավերացումից հետո միայն խորհրդարանում արձանագրությունների քննարկումը սկսելու որոշումն անփոփոխ է:
ԱՄՆ Կոնգրեսի Ներկայացուցիչների պալատի կողմից Հայոց ցեղասպանության բանաձևի ընդունումից հետո Թուրքիայի նախագահ Աբդուլա Գյուլը հայտարարել է, որ «այդ իրադարձությունը կվնասի Հարավային Կովկասում խաղաղության և կայունության ապահովման համար ձեռնարկվող ջանքերին, ինչպես նաև ժողովուրդների միջև բարեկամական հարաբերությունների հաստատմանը»:
Խիստ հայտարարությամբ է հանդես եկել նաև Թուրքիայի ԱԳ նախարար Ահմեդ Դավութօղլուն՝ զգուշացնելով, որ բանաձևի ընդունումը «կարող է հանգեցնել Թուրքիայի և Հայաստանի միջև հարաբերությունների կարգավորման գործընթացի դադարին»:
Հայաստանի և Թուրքիայի հարաբերությունները բավականին լարված էին մինչև վերջին ժամանակները, երբ երկու երկրների արտգործնախարարները հոկտեմբերի 10-ին Ցյուրիխի համալսարանում ստորագրեցին «Դիվանագիտական հարաբերությունների հաստատման մասին արձանագրությունը» և «Երկկողմ հարաբերությունների զարգացման մասին արձանագրությունը»: Փաստաթղթերը ստորագրումից հետո պետք է հավանության արժանանան երկու երկրների խորհրդարանների կողմից:
Հայաստանի և Թուրքիայի միջև չկան դիվանագիտական հարաբերություններ, իսկ 1993-ից, պաշտոնական Անկարայի նախաձեռնությամբ, փակ է հայ-թուրքական սահմանը։
Երկու երկրի միջև բարդ հարաբերությունները պայմանավորված են մի շարք հանգամանքներով, որոնք կապված են, մասնավորապես, Անկարայի՝ ադրբեջանական դիրքորոշման պաշտպանությամբ ղարաբաղյան հարցում, ինչպես նաև Թուրքիայի սուր արձագանքի հետ 1915 թվականին Օսմանյան կայսրությունում Հայոց ցեղասպանության միջազգային ճանաչման հետ կապված։ -0-
