Թուրքիան և Հայաստանը վաղ թե ուշ կկարգավորեն իրենց հարաբերությունները, կարծում է Քարնեգի հիմնադրամի մոսկովյան կենտրոնի փորձագետ Ալեքսեյ Մալաշենկոն:
«Նրանք հարևաններ են, և վաղ թե ուշ կգտնվեն ինչ-որ լուծումներ, դա միանշանակ է: Ավելին՝ Թուրքիան իրեն ավելի ու ավելի դրսևորում է որպես եվրոպական երկիր, և նրան ամենևին էլ պետք չէ նման վատ հարաբերություններ ունենալ Հայաստանի հետ», - հայտարարեց «Նովոստի-Արմենիա» գործակալությանը տված հարցազրույցում:
Ռուս փորձագետն ավելացրեց, որ «Թուրքիան վերջիվերջո կգործի ավելի կոկիկ և ավելի դիվանագիտորեն»:
Ինչ վերաբերում է հայ-թուրքական գործընթացում ստեղծված այսօրվա իրավիճակին, մասնավորապես՝ այդ գործընթացի վրա Հայոց ցեղասպանության ճանաչման մասին ԱՄՆ Կոնգրեսի Արտաքին հարաբերությունների հանձնաժողովի որոշման ազդեցությանը, ապա Մալաշենկոն հայտարարել է, որ իրավիճակի որևէ կտրուկ փոփոխություն և արտառոց բան չի տեսնում, և որ հայ-թուրքական հարաբերությունները զարգանում են սինուսոիդի ձևով:
«Ես չեմ կարող կանխատեսել, թե տեղի կունենան բավականին մեծ փոփոխություններ: Այն, ինչ այժմ մենք նկատում ենք, դա առօրյա գործունեություն է՝ դրական միտումով», - ասաց նա՝ ավելացնելով, որ չի կարծում, թե մոտ ժամանակներում որևէ իրադարձություններ տեղի կունենան, որոնք որակապես կփոխեն ներկա իրավիճակը:
ԱՄՆ Կոնգրեսի արտաքին գործերի հանձնաժողովը մարտի 4-ին ընդունել է Հայոց ցեղասպանության ճանաչման բանաձևը: Բանաձևի ընդունմանը «կողմ» է քվեարկել 23 կոնգրեսական, դեմ՝ 22 կոնգրեսական:
Երեսուն կետից բաղկացած փաստաթուղթը (թիվ 252 բանաձև) կոչ է անում ԱՄՆ նախագահին՝ ջանքեր գործադրել մարդու իրավունքներին և ազատություններին, էթնիկ զտումների և Հայոց ցեղասպանությանը վերաբերող հարցերին արժանի լուծում տալու համար:
Հայաստանի ու Թուրքիայի արտգործնախարարները հոկտեմբերի 10-ին Ցյուրիխի համալսարանում ստորագրեցին «Դիվանագիտական հարաբերությունների հաստատման մասին արձանագրությունը» և «Երկկողմ հարաբերությունների զարգացման մասին արձանագրությունը»: Փաստաթղթերը ստորագրումից հետո պետք է հավանության արժանանան երկու երկրների խորհրդարանների կողմից:
Հայոց Ցեղասպանությունը ХХ դարի առաջին ցեղասպանությունն է։ Թուրքիան ավանդաբար մերժում է Առաջին համաշխարհային պատերազմի տարիներին մոտ մեկուկես միլիոն հայերի զանգվածային ջարդեր իրականացնելու մեղադրանքները և չափազանց ցավագին է վերաբերվում Հայոց Ցեղասպանության հարցի վերաբերյալ Արևմուտքի կողմից արվող քննադատություններին։
Հայոց ցեղասպանության փաստը ճանաչել են բազմաթիվ երկրներ, մասնավորապես, Ուրուգվայը, Լիտվան, Ռուսաստանը, Ֆրանսիան, Իտալիայի խորհրդարանի ստորին պալատը, ԱՄՆ-ի մեծ թվով նահանգներ, ինչպես նաև Հունաստանի, Կիպրոսի, Արգենտինայի, Բելգիայի, Ուելսի խորհրդարանները, Շվեյցարիայի ազգային խորhուրդը, Կանադայի խորհրդարանի համայնքների պալատը և Լեհաստանի սեյմը: Հայոց ցեղասպանությունը ճանաչել է նաև Վատիկանը, Եվրոպական խորհրդարանը, Եկեղեցիների համաշխարհային խորհուրդը:
Հայոց ցեղասպանության զոհերի հիշատակի օրը ապրիլի 24-ն է:-0-
