ՀՀ առողջապահության նախարարությունը մտադիր է խստացնել ինսուլինն անվճար հատկացնելու գործընթացը

ԵՐԵՎԱՆ, 12 մարտի. /Նովոստի-Արմենիա/. ՀՀ առողջապահության նախարար Հարություն Քուշկյանն աշխատանքային խորհրդակցություններ է անցկացրել հանրապետության ամբուլատոր-պոլիկլինիկական, դիսպանսերային բժշկական հաստատություններում շաքարային դիաբետով տառապող հիվանդների հաշվառման, առողջապահության նախարարության կողմից կենտրոնացված կարգով բաշխված ինսուլինների ստացման, պահպանման և հիվանդներին անվճար հատկացման գործընթացը վերլուծելու նպատակով, տեղեկացնում է ՀՀ առողջապահության նախարարությունը:

Հանդիպումներին մասնակցել են հանրապետության առաջատար էնդոկրինոլոգները, մարզային կառույցների ղեկավարները և ոլորտի պատասխանատուները, ինչպես նաև ՀՀ առողջապահության նախարարության ստորաբաժանումների ղեկավարները:

Ոլորտի պատասխանատուները նշել են շաքարային դիաբետով և առհասարակ էնդոկրին հիվանդությունների հայտնաբերման, բուժման ու վարման գործընթացում առկա խնդիրները և կազմակերպչական թերությունները:

Ինչպես նշված է հաղորդագրության մեջ, շաքարային դիաբետով հիվանդներին դեղերով ապահովումը կանոնակարգելու և բաշխման գործընթացը բարելավելու նպատակով  ՀՀ առողջապահության նախարար Հարություն Քուշկյանը հանձնարարել է մշակել ինսուլինի ստացման, բաշխման և հիվանդներին հատկացման նոր` խստացված և առավելագույնը վերահսկելի կարգ, ինչպես նաև կազմակերպել վերապատրաստման դասընթացներ էնդոկրինոլոգների համար:-0-