Կին վարորդները Հայաստանում ավելի բարեխիղճ են, քան տղամարդիկ. Ճանապարհային ոստիկանության պետ

Կին վարորդները Հայաստանում ավելի բարեխիղճ են, քան տղամարդիկ, կարծում է Հայաստանի Ճանապարհային ոստիկանության պետ Մարգար Օհանյանը։

«Վիճակագրության համաձայն՝ կին վարորդներն ավելի քիչ են խախտում երթևեկության կանոնները, քան տղամարդիկ։ Ընդհանուր առմամբ կին վարորդներն  ավելի բարեխիղճ են, քան տղամարդիկ և ավելի հազվադեպ են ընկնում ՃՏՊ-ների մեջ»,- հինգշաբթի մամուլի ասուլիսում հայտնեց Օհանյանը։

Ըստ նրա՝ բոլոր կին վարորդներն օգտվում են անվտանգության ամրագոտիներից, ինչին առայժմ չի հաջողվել հասնել տղամարդկանց շրջանում։ Բացի այդ, ինչպես կարծում է Օհանյանը, կին վարորդները երբեք «չեն գոռոզանում» և իրենց ավելի համեստ են պահում։ Սակայն Ճանապարհային ոստիկանության պետը չկարողացավ տվյալներ ներկայացնել Հայաստանի կին վարորդների թվի վերաբերյալ, քանի որ նմանատիպ  վիճակագրություն չի տարվում։

«Մենք մեր կին վարորդների համար միամսյակ չենք անցկացնի, որովհետև մենք ուշադիր ենք մեր կանանց նկատմամբ ողջ տարին»,- ընդգծեց Օհանյանը։

Խոսելով Հայաստանում Ճանապարհային ոստիկանության կանանց ստորաբաժանում ստեծելու մասին՝ Օհանյանն ասաց, որ ավելի վաղ նմանատիպ ստորաբաժանում գործել է, սակայն չի արդարացրել իրեն։ Ինչպես նա պարզաբանեց, տեսուչի աշխատանքը կնոջ համար շատ ծանր էր, և կին ոստիկանները ժամանակի ընթացքում անցան Հայաստանի ոստիկանության այլ ստորաբաժանումներ կամ ազատվեցին ծառայությունից։ -0-