Եվրոպայում ղարաբաղյան հակամարտության թեման ոչ ոքի արդեն չի հետաքրքրում, չորեքշաբթի լրագրողներին «Նովոստի» միջազգային մամուլի կենտրոնում տեղի ունեցած մամուլի ասուլիսի ժամանակ ասաց Ղարաբաղում, Չեչնիայում, Բոսնիայում մարտական գործողությունները լուսաբանող հայտնի չեխ լրագրող Դանա Մազալովան:
«Եվրոպայում այսօր այդ թեման ոչ ոքի չի հետաքրքրում, այն հետաքրքրիր էր այն ժամանակ, երբ սկսվում էր հակամարտությունը, իսկ այժմ եվրոպացիները ցանկանում են հեռու մնալ հակամարտությունից», - ասաց Մազալովան:
Ինչպես նշեց հայտնի լրագրողը, հակամարտության կարգավորման համար ստեղծվել է ԵԱՀԿ Մինսկի խումբը, որը և զբաղվում է այդ հարցով պրոֆեսիոնալ մակարդակով:
«Սակայն հասարակ եվրոպացի քաղաքացիներին այդ հարցն արդեն չի հետաքրքրում», - ասաց Մազալովան:
Ղարաբաղյան հակամարտությունը սկիզբ է առել 1988 թ.-ին, երբ հիմնականում հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին։
1991 թ. դեկտեմբերի 10-ին, Խորհրդային Միության փլուզումից մի քանի օր առաջ, Լեռնային Ղարաբաղում տեղի ունեցավ հանրաքվե, որի ժամանակ բնակչության ճնշող մեծամասնությունը՝ 99,89 տոկոսը Ադրբեջանից ամբողջովին անկախանալու կողմ քվեարկեց։
Դրանից հետո սկսվեցին լայնամասշտաբ ռազմական գործողություններ, որոնց հետևանքով Ադրբեջանը կորցրեց վերահսկողությունը Լեռնային Ղարաբաղի և նրան հարակից յոթ շրջանների նկատմամբ։
1994 թ.-ի մայիսի 12-ին՝ զինադադարի մասին համաձայնագրի ուժի մեջ մտնելուց հետո հակամարտության գոտում դադարեցին ռազմական գործողությունները։ Պատերազմի հետևանքով երկու կողմից զոհվեց մոտավորապես 25-30 հազ մարդ և մոտ մեկ միլիոնը ստիպված եղավ լքել բնակավայրերը։
Զինադադարի ռեժիմի մասին համաձայնությունը պահպանվում է մինչ այժմ։
1992 թ.-ից մինչ օրս ընթանում են բանակցություններ հակամարտության խաղաղ կարգավորման ուղղությամբ ԵԱՀԿ Մինսկի խմբի շրջանակներում, որի համանախագահներն են ԱՄՆ-ն, Ռուսաստանը և Ֆրանսիան։-0-
