ՀՀ նախագահ Սերժ Սարգսյանը չորեքշաբթի Ելիսեյան պալատում կհանդիպի Ֆրանսիայի նախագահ Նիկոլա Սարկոզիի հետ, չորեքշաբթի հաղորդում է ՀՀ նախագահի մամուլի ծառայությունը:
«Պաշտոնական այցի շրջանակում մարտի 10-ին կեսօրին Ելիսեյան պալատում նախատեսված է նախագահ Սերժ Սարգսյանի հանդիպումը Ֆրանսիայի նախագահ Նիկոլա Սարկոզիի հետ: Ֆրանսիայի նախագահի անունից՝ ի պատիվ Հայաստանի նախագահի, կտրվի պաշտոնական ճաշ: Այնուհետև նախագահ Սարգսյանը կհյուրընկալվի Ֆրանսիայի Սենատի նախագահ Ժերար Լարշեին և Ազգային ժողովի նախագահ Բեռնար Ակուայեին, կհանդիպի ֆրանսահայ համայնքի ներկայացուցիչների հետ», - ասվում է տեղեկատվության մեջ:
ՀՀ նախագահ Սերժ Սարգսյանի պաշտոնական այցը Ֆրանսիա մեկնարկել է մարտի 9-ին:
«ՀՀ նախագահի պաշտոնը ստանձնելուց ի վեր սա Սերժ Սարգսյանի առաջին պաշտոնական այցն է բարեկամ Ֆրանսիայի Հանրապետություն: Նախագահ Սարգսյանի գլխավորած պատվիրակության կազմում են արտգործնախարար Էդուարդ Նալբանդյանը, սփյուռքի նախարար Հրանուշ Հակոբյանը, ԱԺ պատգամավոր, հայ-ֆրանսիական բարեկամության պատգամավորական խմբի ղեկավար Արա Բաբլոյանը, պաշտոնատար այլ անձինք», - ասվում է տեղեկատվության մեջ:
Ինչպես հաղորդում է ՀՀ նախագահի մամուլի ծառայությունը, պաշտոնական այցի առաջին օրը նախագահ Սարգսյանն այցելել է Փարիզի «Մատինյոն» ցուցասրահ, հանդիպել ֆրանսահայ ճանաչված գեղանկարիչ Ժանսեմի հետ, շրջել ցուցասրահում և ծանոթանացել նրա ստեղծագործական հարուստ ժառանգությանը:
«Մեր ժողովուրդն իսկապես հպարտանում է Ձեզանով ու բարձր գնահատում Ձեր արվեստը: Ապրելով այլ երկրում` Դուք ավելի ճանաչելի եք դարձրել մեր ժողովրդին` ողջ աշխարհում տարածելով հայ ժողովրդի բարի համբավը», - նշել ՀՀ նախագահը:
Հայ-ֆրանսիական մշակութային կապերի ամրապնդման գործում ներդրած նշանակալի ավանդի համար, ինչպես նաև ծննդյան 90-ամյակի առթիվ ֆրանսահայ անվանի նկարիչ Ժանսեմը ՀՀ նախագահի հրամանագրով պարգևատրվել է Պատվո շքանշանով:
Հայաստանի Հանրապետության նախագահն ու գեղանկարիչը մտքեր են փոխանակել հայապահպանության ու Հայաստան-Սփյուռք կապերի ամրապնդման խնդիրների շուրջ:
«Սփյուռքի նախարարության ստեղծման նպատակներից մեկն էլ արտերկրում ապրող մեր հայրենակիցների հայապահպանության խնդրի լուծմանը նպաստելն է: Մենք որպես անկախ Հայաստանի Հանրապետության իշխանություն՝ պետք է աշխատենք ստեղծել այնպիսի երկիր, որ հայկական ինքնությունը կրող և արտերկրում ապրող մեր յուրաքանչյուր հայրենակից հպարտանա իր Հայրենիքով»,- նշել է նախագահ Սերժ Սարգսյանը: -0-
