2010 թվականի ընթացքում Հայաստանում 40 ավագ դպրոց կստեղծվի, ասաց ՀՀ ԿԳ նախարար Արմեն Աշոտյանը։
«Այժմ Հայաստանում 48 ավագ դպրոց է գործում, 2010-ին կստեղծվի ևս 40-ը, հաջորդ տարի կլինեն ևս 40-ը։ Արդյունքում մեզ մոտ՝ Հայաստանում, կգործի 150 ավագ դպրոց, երեքշաբթի լրագրողներին ասաց Աշոտյանը։
Ինչպես հիշեցրեց նախարարը, ավագ դպրոցի ստեղծման գործընթացը սկսվել է դեռ 2006թ.-ին, երբ ԿԳՆ-ում ստեղծվեց աշխատանքային խումբ, մշակվեցին ավագ դպրոցի համակարգի ձևավորման սկզբունքները։
Աշոտյանի խոսքով, 2008թ.-ին մշակվեց ավագ դպրոցի ներդրման առաջին ռազմավարությունն ու փորձնական ծրագիրը, և այն սկսվեց իրականացվել: Նախարարի կարծիքով, Հայաստանում ավագ դպրոցի ստեղծումն այլընտրանք չուներ, քանի որ անհրաժեշտ է կրթության որակի բարձրացումը:
«Մենք չենք կարող յուրաքանչյուր աշակերտի համար մասնագիտացած կրթություն երաշխավորել ՀՀ բոլոր 1400 հանրակրթական դպրոցներում: Ոչ մի բարեկեցիկ եվրոպական երկիր նման բան չի երաշխավորում, իսկ ավագ դպրոցի ներդրումը վաղուց արդեն գործում է այլ երկրներում: Մի շարք եվրոպական երկրներում նման տարանջատումն ու աշակերտների նկատմամբ առանձին մոտեցումը սկսվում է արդեն 5-6-րդ դասարաններից»,- նշեց Աշոտյանը:
Միաժամանակ Աշոտյանը հիշեցրեց, որ Հայաստանում կրթական նախկին համակարգին վերադառնալու այլընտրանք նույնպես չկա: Նրա կարծիքով, ավագ դպրոցի ներդրումով հարկ է լուծել առկա խնդիրներն ու շտկել իրավիճակը:
«Սակայն սպասել, որ երկու տարում մենք ականավոր ձեռքբերումներ կունենանք, անհնար է»,- ընդգծեց նա:
Նախարարը նկատեց, որ Հայաստանում կրթության որակը բարձրացնելու համար ներդրվում է դպրոցների տնօրենների հավաստագրման ինստիտուտը: Ինչպես վստահեցրեց ԿԳ նախարարը, դպրոցի տնօրեն դառնալու համար բոլոր թեկնածուները քննություն կանցնեն, որի արդյունքներով էլ հավաստագրեր կտրվեն: Տրված հավաստագրերի հիման վրա, ըստ Աշոտյանի, տնօրենի թեկնածուները կմասնակցեն ընտրություններին:
«Այսպիսով, մենք կկանխենք անբավարար որակավորում ունեցող անձանց մուտքը դպրոց»,- ասաց Աշոտյանը:-0-
