ՀՀ նախագահը Թուրքիայում տեղի ունեցած աղետալի երկրաշարժի կապակցությամբ ցավակցական հեռագիր է հղել Աբդուլլահ Գյուլին

ՀՀ նախագահը Թուրքիայում տեղի ունեցած աղետալի երկրաշարժի կապակցությամբ ցավակցական հեռագիր է հղել Աբդուլլահ Գյուլին:

«ՀՀ նախագահը Հայաստանի ժողովրդի և անձամբ իր անունից անկեղծ ցավակցություն է հայտնել Թուրքիայի նախագահին և զոհվածների հարազատներին», - հաղորդում է ՀՀ նախագահի մամուլի ծառայությունը:

Երկուշաբթի Թուրքիայի արևելքում գտնվող Էլյազիգ գավառում տեղի ունեցած ուժեղ երկրաշարժի հետևանքով 51 մարդ է զոհվել:

6,0 մագնիտուդով երկրաշարժը տեղի է ունեցել Անկարայից 550 կմ հեռավորության վրա Երևանի ժամանակով ժամը 4:32-ին և զգացվել է արևելյան Թուրքիայի շատ շրջաններում: Հզոր ստորգետնյա ցնցման հետևանքով երկրաշարժի էպիկենտրոնում գտնվող շրջաններում ամբողջովին ավերվել են տասնյակ տներ, բազմաթիվ շինություններում ճաքեր են առաջացել:

Առաջին երկրաշարժից հետո Էլյազիգ գավառում մեկ օրվա ընթացքում գրանցվել է ավելի քան 40 ստորգետնյա ցնցում, այդ թվում նաև՝ երեք ցնցում 5,5, 5,1 և 5,3 մագնիտուդով, իր կայքում տեղեկացրել է Բոսֆորի համալսարանի սեյսմիկ կենտրոնը:-0-