ՀՀ ԱԺ պատգամավոր Լարիսա Ալավերդյանը չի բացառում ԱՄՆ Կոնգրեսի կողմից Հայոց ցեղասպանության ճանաչումը՝ նույնիսկ հաշվի առնելով նախագահ Օբամայի վարչակազմի հակազդեցությունը:
«Եթե դատենք անցյալով, ապա բանաձևը չեն ճանաչի: Սակայն եթե հաշվի առնենք այն, որ Կոնգրեսի Ներկայացուցիչների պալատի խոսնակ Նենսի Փելոսին նախկինում հստակ հայտարարում էր այդ հարցի շուրջ ունեցած իր դիրքորոշման մասին, ապա մենք պետք է համարենք, որ հնարավորությունը 50/05-է », - հայտարարեց նա:
Պատգամավորն ավելացրեց, որ բանաձևին «կողմ» քվեարկած կոնգրեսականների որոշումը բացատրվում էր որպես ապագայում նման իրադարձությունները թույլ չտալու ցանկություն, այդ թվում նաև որպես Թուրքիայի վրա ճնշում գործադրելու ձգտում, որը ձգտում է տարածաշրջանում էլ ավելի ինքնուրույն դերի:
ԱՄՆ Կոնգրեսի արտաքին գործերի հանձնաժողովը հինգշաբթի ընդունել է Հայոց ցեղասպանության ճանաչման բանաձևը: Բանաձևի ընդունմանը «կողմ» է քվեարկել 23 կոնգրեսական, դեմ՝ 22 կոնգրեսական:
Ալավերդյանի կարծիքով՝ Կոնգրեսի կողմից Ցեղասպանության ճանաչմանը կարող է աջակցել նաև հոգեբանական գործոնը, մասնավորապես՝ հանձնաժողովի որոշման նկատմամբ Թուրքիայի նյարդային արձագանքը և թուրքական մամուլում հնչող վիրավորանքները բանաձևին «կողմ» քվեարկած ամերիկացի կոնգրեսականների հասցեին:
«Այնպիսի տպավորություն է, թե Թուրքիան ինքն ամեն ինչ անում է, որպեսզի Կոնգրեսը ճանաչի ցեղասպանությունը», - նշեց նա:
Միաժամանակ Ալավերդյանը ընդգծեց, որ նույնիսկ այն կոնգրեսականները, ովքեր բանաձևին «դեմ» են քվեարկել, կասկածի տակ չէին դնում Ցեղասպանության փաստը, այլ իրենց որոշումը բացատրում էին քաղաքական նպատակահարմարությամբ:
Հայոց Ցեղասպանությունը ХХ դարի առաջին ցեղասպանությունն է։ Թուրքիան ավանդաբար մերժում է Առաջին համաշխարհային պատերազմի տարիներին մոտ մեկուկես միլիոն հայերի զանգվածային ջարդեր իրականացնելու մեղադրանքները և չափազանց ցավագին է վերաբերվում Հայոց Ցեղասպանության հարցի վերաբերյալ Արևմուտքի կողմից արվող քննադատություններին։--0--
