Հայաստանի նախագահը նշանակալի իրադարձություն է անվանել Էմիր Կուստուրիցայի այցը Երևան

ԵՐԵՎԱՆ, 9 մարտի. /Նովոստի-Արմենիա/. Հայաստանի նախագահ Սերժ Սարգսյանը շաբաթ օրն ընդունել է սերբ աշխարհահռչակ կինոռեժիսոր, երաժիշտ Էմիր Կուստուրիցային, հաղորդում է երկրի ղեկավարի մամուլի ծառայությունը: Անվանի կինոռեժիսորը Հայաստանում է գտնվում իր ղեկավարած “The No Smoking Orchestra” խմբի հետ:

«Հաճույք է Ձեզ հյուրընկալել հայկական հողում: Ձեր այցելությունը նշանակալի իրադարձություն է մեր երկրի համար: Մեր ժողովուրդները պատմական ճակատագրով պայմանավորված շատ ընդհանրություններ ունեն, և Ձեր արվեստն ու երաժշտությունը հոգեհարազատ են մեր ժողովրդին»,- ասել է նախագահ Սարգսյանը:

Էմիր Կուստուրիցան Հանրապետության նախագահին փոխանցել է այցելությունից ստացած իր տպավորությունները:

«Հայաստանը շատ գեղեցիկ երկիր է: Մեր ժողովուրդները պատմական ողբերգական անցյալի առումով մեծ ընդհանրություններ ունեն, և ես ուրախ եմ այս այցելության համար, որը ինձ հնարավորություն է տալիս` արտահայտելու այդ ամենի մասին իմ զգացմունքներն ու ամրապնդելու մեր ժողովուրդների բարեկամությունը»,- ընդգծել է աշխարհահռչակ կինոռեժիսորը: 

Էմիր Կուստուրիցան Սերժ Սարգսյանին տեղեկացրել է նաև իր առաջիկա ստեղծագործական ծրագրերի մասին: Նա միաժամանակ ասել է. որ կգործադրի հնարավոր ջանքերն` աջակցելու հայկական «Ոսկե ծիրան» կինոփառատոնին:-0-