Թուրքիան օգտագործում է բոլոր հնարավոր մեխանիզմները Շվեդիայի խորհրդարանի կողմից հայոց ցեղասպանության ճանաչումը թույլ չտալու համար, ասաց ՀՅԴ Գերագույն մարմնի ներկայացուցիչ, ՀՀ խորհրդարանի արտաքին հարաբերությունների մշտական հանձնաժողովի նախագահ Արմեն Ռուստամյանը:
«Շվեդիայում Հայոց Ցեղասպանության հարցում նույնպիսի պայքար է ծավալվում ինչպիսին ԱՄՆ կոնգրեսի կոմիտեում: Թուրքերը պայքարի մեխանիզմներ ունեն և առավելագույնս օգտագործում են դրանք»,- ուրբաթ «Նովոստի» միջազգային մամուլի կենտրոնում հրավիրված ասուլիսի ժամանակ ասաց Ռուստամյանը:
ԱՄՆ Կոնգրեսի արտաքին գործերի հանձնաժողովը մարտի 4-ին ընդունել է Հայոց ցեղասպանության ճանաչման բանաձևը: Բանաձևի ընդունմանը «կողմ» է քվեարկել 23 կոնգրեսական, դեմ՝ 22 կոնգրեսական: Քվեարկությունը չի նշանակում, որ բանաձևը վերջնականապես ընդունվել է, այժմ փաստաթուղթը հաստատված տեսքով պետք է ներկայացվի ներկայացուցիչների պալատի ամբողջական կազմի քննարկմանը:
Պատգամավորի խոսքերով, Շվեդիայի խորհրդարանի կողմից հայոց Ցեղասպանության ճանաչման հարցում պարբերաբար հանդիպումներ ու բանակցություններ են անցկացվում: Նա հիշեցրեց, որ Շվեդիայի իշխող սոցիալ-դեմոկրատական կուսակցությունը սատարում է Հայոց Ցեղասպանության ճանաչման որոշմանը և մշտապես կապի մեջ է ՀՅԴ հետ:
Մարտի 17-ին Շվեդիայի խորհրդարանում քննարկման կդրվեն հայերի, ասորիների և քաղդեացիների ցեղասպանությունների ընդունման եւ դատապարտման հարցերը:
Խոսելով Հայոց Ցեղասպանության առնչությամբ ԱՄՆ Կոնգրեսի կոմիտեում բանաձև ընդունելու մասին՝ հայ պատգամավորը նշեց, որ քննարկումը բավականին դրամատիկ էր ու բնութագրվում էր Վաշինգտոն ժամանած թուրք խորհրդարանականների ակտիվ դիմադրությամբ, ովքեր բազմաթիվ հանդիպումներ ունեցան կոնգրեսմենների հետ: Ռուստամյանը տեղեկացրեց, որ հայկական կողմը բանաձևի ընդունումը խթանելով փորձում էր պոկել «լռության քողը»:
«Հայոց Ցեղասպանության ճանաչումն ընդունելու մեր պայքարն արդար է, և Ցեղասպանության հարցը մեզ համար շահարկման առարկա չէ»,- ընդգծեց նա:
Հայոց Ցեղասպանությունը ХХ դարի առաջին ցեղասպանությունն է, որին զոհ գնաց 1,5 միլիոն հայ:
Հայոց ցեղասպանության փաստը ճանաչել են բազմաթիվ երկրներ: Առաջինը դա 1965 թ.-ին արել է Ուրուգվայը, որի օրինակին հետևել են Ռուսաստանի Դաշնությունը, Իտալիան, Գերմանիան, Հոլանդիան, Բելգիան, Լեհաստանը, Լիտվան, Սլովակիան, Շվեդիան, Շվեյցարիան, Հունաստանը, Կիպրոսը, Լիբանանը, Կանադան, Վենեսուելան, Արգենտինան, ԱՄՆ-ի 42 նահանգները: Հայոց ցեղասպանությունը ճանաչել է նաև Վատիկանը, Եվրոպական խորհրդարանը, Եկեղեցիների համաշխարհային խորհուրդը:
Թուրքիան ավանդաբար մերժում է Առաջին համաշխարհային պատերազմի տարիներին մոտ մեկուկես միլիոն հայերի զանգվածային ջարդեր իրականացնելու մեղադրանքները և չափազանց ցավագին է վերաբերվում Հայոց Ցեղասպանության հարցի վերաբերյալ Արևմուտքի կողմից արվող քննադատություններին։-0-
