ԵՐԵՎԱՆ, 4 մարտի. /Նովոստի-Արմենիա/. «Տրոյկա Դիալոգ» («Եռյակ երկխոսություն») ընկերությունների խմբի տնօրենների խորհրդի ղեկավար Ռուբեն Վարդանյանը չի բացառում «Տրոյկա Դիալոգ» ընկերությունից հեռանալու հնարավորությունը:
«Ես միշտ ասում եմ, և բացարձակ չեմ թաքցնում, որ որևէ փուլում ես կլքեմ «Տրոյկա Դիալոգ»-ը, և ոչինչ, «Տռոյկա Դիալոգ»-ը որպես ինստիտուտ կաշխատի ու կզարգանա»,- հինգշաբթի Երևանում նա ասաց լրագրողներին:
Մեկնաբանելով «Տրոյկա Դիալոգ» ԸԽ տնօրինության կառավարիչ Պավել Տեպլուխինի հեռանալը ընկերությունից, Վարդանյանն ասաց, որ «մեր ընկերությունը խորհրդային ժամանակների Քաղբյուրո չէ, երբ ընկերությունից հեռանալու միակ տարբերակն այն է, որ քեզ այնտեղից մեռած են տանում»:
«Մենք ավելի դինամիկ ժամանակներում ենք ապրում, և համատեղ աշխատանքի այս 15 տարում գալիս է ժամանակ, երբ յուրաքանչյուրը փորձում է հասկանալ, թե ինքն ինչ է անելու հետո»,- ընդգծեց Վարդանյանը:
2010թ.-ի հունվարի 18-ին «Տրոյկա Դիալոգ» ԸԽ հայտարարեց, որ Ընկերախմբի կառավարիչ տնօրեն և «Տրոյկա Դիալոգ» ԿԸ տնօրենների խորհրդի նախագահ Պավել Տեպլուխինը լքում է ընկերությունը: Հաղորդագրության մեջ նշվում էր, որ գործերի, նախագծերի, հաճախորդների, պաշտոնների փոխանցման իրավաբանական ու փաստացի ժամանակահատվածը կտևի մինչև մարտի վերջը:
Ընդ որում Վարդանյանը հույս հայտնեց, որ Տեպլուխինի և շատ այլ գործընկերների հետ համատեղ հաջողվել է «շատ ժամանակակից մեքենա» կառուցել:
«Մենք փողի կառավարման առաջատարներն ենք ԱՊՀ տարածքում, մենք մասնավոր հարուստ հաճախորդների սպասարկման առաջատարներն ենք, այդ թվում և Պավելի շնորհիվ»,- պարզաբանեց նա:
Տնօրենների խորհրդի ղեկավարն ասաց նաև, որ ԸԽ բաժնետոմսերի մասի գնման ընթացակարգերը շատ հեշտ են:
«Մենք գործընկերային մեխանիզմ ունենք, որը նույնն է բոլորի համար, և հեռացողի բաժնետոմսերը գնում է Գործընկերությունը: Կան կանոններ, որոնցով գործընկերությունը գնում է բոլոր գործընկերների բաժինը: Ընկերության գործընկեր-համասեփականատերերը 130-ն են, որոնք համատեղ գնում են այդ փաթեթը»,- պարզաբանեց նա:
«Տրոյկա Դիալոգ» ԸԽ հիմնադրվել է Ռուսաստանում 1991 թ.-ին: -0-
