Ուկրաինայում ապրող հայերի քանակն ավելացել է 10 անգամ և կազմել 300 հազար. Ուկրաինայի դեսպան
ԵՐԵՎԱՆ, 4 մարտի. /Նովոստի-Արմենիա/. Ուկրաինայում ապրող հայերի քանակը վերջին տասնամյակում ավելացել է 10 անգամ և կազմել 300 հազար, հայտնեց Հայաստանում Ուկրաինայի Արտակարգ և լիազոր դեսպան Ալեքսանդր Բոժկոն:
«Հայ-ուկրաինական հարաբերությունները խոր ու պատմական արմատներ ունեն, ինչը խոսում է այն մասին, որ հայերը Ուկրաինայում սկսել են բնակվել հինավուրց ժամանակներից: Այսպիսով ԽՍՀՄ փլուզումից հետո, եթե Ուկրաինայում 90-ականների սկզբին շուրջ 30 հազար հայ կար, ապա ներկայում այդ թիվը 10 անգամ ավելացել է՝ կազմելով 300 հազար»,- հինգշաբթի մամուլի ասուլիսի ժամանակ ասաց Բոժկոն:
Ըստ նրա, Ուկրաինայի համար կարևոր նշանակություն ունի Հայաստանի հետ լավ բարեկամական հարաբերությունների զարգացումը, և այդ առումով հայ ժողովուրդը հատուկ տեղ ունի ուկրաինական հասարակության կյանքում:
«Բարձր է հայերի դերը ուկրաինական հասարակության կյանքում: Նրանք եկեղեցիներ են կառուցում, զարգացնում են մշակույթն ու արվեստը»,- ընդգծեց դեսպանը:
Հայերն առաջին անգամ Ուկրաինայում են հայտնվել Կիևյան Ռուսիայի օրոք: Այսօր հայերի առավելագույն խտությունը Ուկրաինայում դիտվում է Դոնեցկի, Խարկովի և Դնեպրոպետրովսկի մարզերում: -0-
