Հայաստանը նորմալ զարգացման մեծ հեռանկարներ ունի, ասաց «Տրոյկա Դիալոգ» ընկերությունների խմբի Տնօրենների խորհրդի ղեկավար Ռուբեն Վարդանյանը։
«Պարզապես ինքնաբերաբար ոչինչ չի ստացվի, պետք է շատ աշխատել և փորձել հաղթահարել սեփական թուլությունները և բարդ արտաքին հանգամանքները»,- հինգշաբթի Երևանում լրագրողներին հայտնեց Վարդանյանը։
Վարդանյանն ընդգծեց, որ Հայաստանի կառավարության նախագծերը կարող են գրավիչ լինել օտարերկրյա ներդրողների, այդ թվում՝ սփյուռքի ներդրողների համար, «կարևորը, որ դրանք պրոֆեսիոնալ կատարված լինեն»։
«Մենք տարբեր համայնքներ ունենք, որոնք տարբեր կերպ են նայում Հայաստանում ներդրումներ կատարելու հնարավորությանը, կարևորը, որ դա բազմապատկվող էֆեկտ տա»,- պարզաբանեց նա։
Վարդանյանը նշեց, որ այդ նախագծերը կարող են ոչ միայն տնտեսական էֆեկտ տալ, այլև նոր աշխատատեղերի, նոր չափանիշների ստեղծման հնարավորություններ տալ, ինչպես նաև թույլ տալ փոփոխել վերաբերմունքն այն ամենի նկատմամբ, ինչ տեղի է ունենում Հայաստանում։
«Այս տեսանկյունից այդ նախագծերի շարքում կան շատ լավերն ու հետաքրքիրները, որոնք, մասնավորապես, կապված են ուռուցքաբանության և զբոսաշրջության հետ»,- ասաց նա։
Հայաստանի կառավարությունը 2009 թվականի փետրվարի 19-ին հավանության է արժանացրել հանրապետությունում Երևանի ֆիզիկայի ինստիտուտի (ԵրՖԻ) բազայի վրա Միջուկային բժշկության և ուռուցքային հիվանդությունների դեմ պայքարի՝ մոտ 30 մլն եվրո արժողությամբ կենտրոնի ստեղծման որոշումը։
Հայաստանի ազգային մրցունակության հիմնադրամի հոգաբարձուների խորհրդի կողմից 2009 թվականին Հայաստանում հաստատվել և իրագործվում է Տաթևի վանքի վերականգնման և վերածնման՝ 20 մլն դոլար արժողությամբ ծրագիրը, ինչպես նաև վանքի մերձակայքում զբոսաշրջային համալիրի ստեղծման ծրագիրը, ինչը խթանի դեր կխաղա Հայաստանի հարավային մարզերում զբոսաշրջության զարգացման հարցում։ -0-
