Եվրոպական ժողովրդական կուսակցությունը շահագրգռված է հայկական կուսակցությունների հետ համագործակցությամբ, հինգշաբթի Երևանում հայտարարեց Բելգիայի նախկին վարչապետ, Եվրոպական ժողովրդական կուսակցության նախագահ Վիլֆրիդ Մարտենսը:
«Մենք ցանկանում ենք Հայաստանում ունենալ գործընկերներ և կուսակցություններ, որոնք պատրաստ են մտնել Եվրոպական ժողովրդական կուսակցության շարքերը», - ասաց Մարտենսը «Եվրոպա.ես պայքարեցի, ես հաղթեցի» ինքնակենսագրության շնորհանդեսի ժամանակ:
Նրա խոսքերով՝ իր այցից հետո Հայաստան կուղևորվի ԵԺԿ-ի պատվիրակությունը՝ համագործակցությամբ շահագրգռված կուսակցությունների հետ կապերի հաստատման համար: Նա նշեց, որ Եվրոպական ժողովրդական կուսակցությունը արդեն ունի նման պրակտիկա՝ կապված բալկանյան կուսակցությունների հետ:
Մարտենսն ասաց, որ Հայաստանը՝ որպես եվրոպական երկիր, ունի նույն խնդիրները, ինչ Եվրոպայի մյուս բոլոր երկրները:
«Եվրոպական բոլոր ազգերը կարող են համախմբվել, որպեսզի, հիմնվելով համամարդկային արժեքների վրա, աշխատեն միասին ընդհանուր խնդիրների հաղթահարման համար», - ընդգծեց Մարտենսը:
Հայաստանի Ազգային պատկերասրահում տեղի ունեցած շնորհանդեսին ներկա էին ՀՀ վարչապետ Տիգրան Սարգսյանը, կառավարության, Ազգային ժողովի ներկայացուցիչներ, մասնավորապես՝ ԵԽԽՎ-ում հայկական պատվիրակության անդամները:
«Գիրքը կարող է ծառայել որպես դասագիրք երիտասարդ քաղաքական գործիչների համար», - իր ողջույնի խոսքում նշեց վարչապետը:
Եվրոպական ժողովրդական կուսակցությունը (European People's Party, EPP) ամենամեծ եվրոպական քաղաքական կուսակցությունն է: Հիմնադրվելով 1976 թ.-ին՝ նա իր մեջ ներառում է ողջ Եվրամիության մոտ գաղափարախոսություն ունեցող ազգային քրիստոնեադեմոկրատական կուսակցություններին և այլ ազգային կուսակցությունների՝ որպես կոլեկտիվ անդամներ:
ԵԺԿ-ն ԵՄ-ի անդամ-պետություններում և ասոցացված անդամ-պետություններում միավորում է մոտ գաղափարախոսություն ունեցող ազգային կուսակցությունների, ինչպես նաև սերտ կապեր ունի ԵՄ հնարավոր թեկնածու-անդամների հետ:
ԵԺԿ-ն ունի երիտասարդական բաժին՝ Եվրոպական ժողովրդական կուսակցության երիտասարդությունը (YEPP): Եվրոպացի ուսանող-դեմոկրատները (EDS) ԵԺԿ-ի հետ ասոցացված ուսանողական քաղաքական կուսակցությունների խումբ է:-0-
