Հայաստանի խորհրդարանը կվավերացնի հայ-թուրքական արձանագրությունները Թուրքիայից հետո. խոսնակ

Հայաստանի խորհրդարանը կվավերացնի հայ-թուրքական արձանագրությունները Թուրքիայի խորհրդարանի կողմից դրանց վավերացումից հետո, ասել է ՀՀ ԱԺ խոսնակ Հովիկ Աբրահամյանը չորեքշաբթի «ARTOC Group» միջազգային ներդրումային ընկերության պատվիրակության հետ հանդիպման ժամանակ:

«Հանդիպման ընթացքում հյուրերի խնդրանքով ՀՀ ԱԺ նախագահ Հովիկ Աբրահամյանն անդրադարձել է նաև Ցյուրիխում ստորագրված հայ-թուրքական արձանագրությունների վավերացման գործընթացին: Աբրահամյանը ևս մեկ անգամ փաստել է, որ հայ-թուրքական արձանագրությունները պետք է առնչվեն բացառապես Հայաստանի և Թուրքիայի միջև դիվանագիտական հարաբերությունների հաստատմանը և սահմանի բացմանը: ՀՀ ԱԺ նախագահը նշել է, որ Հայաստանի խորհրդարանը կվավերացնի հայ-թուրքական արձանագրությունները Թուրքիայի խորհրդարանի կողմից դրանց վավերացումից հետո», - հաղորդում է ՀՀ ԱԺ մամուլի ծառայությունը:

Հայաստանի և Թուրքիայի միջև չկան դիվանագիտական հարաբերություններ, իսկ 1993-ից, պաշտոնական Անկարայի նախաձեռնությամբ, փակ է հայ-թուրքական սահմանը։

Երկու երկրների միջև բարդ հարաբերությունները պայմանավորված են մի շարք հանգամանքներով, որոնք կապված են, մասնավորապես, Անկարայի՝ ադրբեջանական դիրքորոշման պաշտպանությամբ ղարաբաղյան հարցում, ինչպես նաև Թուրքիայի սուր արձագանքի հետ 1915 թվականին Օսմանյան կայսրությունում Հայոց ցեղասպանության միջազգային ճանաչման հետ կապված:

Հայաստանի և Թուրքիայի հարաբերությունները բավականին լարված էին մինչև վերջերս, երբ երկու երկրների արտգործնախարարները հոկտեմբերի 10-ին Ցյուրիխի համալսարանում ստորագրեցին «Դիվանագիտական հարաբերությունների հաստատման մասին արձանագրությունը» և «Երկկողմ հարաբերությունների զարգացման մասին արձանագրությունը»: Փաստաթղթերը ստորագրումից հետո պետք է հավանության արժանանան երկու երկրների խորհրդարանների կողմից:

Ավելի վաղ ՀՀ ԱԺ արտաքին հարաբերությունների մշտական հանձնաժողովն առաջարկել է ՀՀ ԱԺ խոսնակ Հովիկ Աբրահամյանին չքննարկել հայ-թուրքական արձանագրությունները լիագումար նիստի ժամանակ՝ մինչև իր եզրակացության հրապարակումը:-0-