Հայ ժողովրդագիրը ծնելիության կտրուկ նվազում է կանխատեսում

ԵՐԵՎԱՆ, 3 մարտի. /Նովոստի-Արմենիա/. Առաջիկա տասը տարիների ընթացքում Հայաստանում կնկատվի ծնելիության էական նվազում, չորեքշաբթի մամուլի ասուլիսի ընթացքում հայտարարեց ժողովրդագիր Ռուբեն Եգանյանը։

«Այսօրվա ծնելիության 8-տոկոսանոց մակարդակը պայմանավորված է ոչ միայն նրանով, որ յուրաքանչյուր ընտանիքում ծնվում է ավելի շատ երեխա, որքան որ մեծ է վերարտադրողական տարիքի անձանց թիվը։ Բանն այն է, որ ներկայում վերարտադրողական տարիքի անձինք 80-ական թվականներին ծնված մարդիկ են, իսկ այն ժամանակ ծնելիությունը շատ բարձր է եղել՝ տարեկան շուրջ 75 հազար երեխա»,- նշեց Եգանյանը։

Ըստ նրա, առաջիկա տարիներին, երբ 80-ականների վերջի-90-ականների սկզբի սերունդը կմտնի վերարտադրողական տարիք, հանրապետության բնակչության աճը կտրուկ կկրճատվի, քանի որ այդ ժամանակահատվածում հանրապետությունում ծնելիությունը շատ ցածր է եղել։

«Էական հավասարակշռություն պահպանելու համար անհրաժեշտ է, որպեսզի այդ սերունդը երկու անգամ ավելի երեխա ունենա, քան ներկա սերունդը»,- ասաց ժողովրդագիրը։

Իր հերթին Հայաստանի Ազգային վիճակագրական ծառայության մարդահամարի և ժողովրդագրության բաժնի պետ Կարինե Կույումջյանը հայտնեց, որ 2009 թվականին Հայաստանի նորածինների թիվը կազմել է 44,5 հազար, ինչն 8 տոկոսով շատ է նախորդ տարվա ցուցանիշից։

«Այլ կերպ ասած՝ Հայաստանում 1000 մարդուն բաժին է ընկել 13,7 նորածին։ Համեմատության համար՝ Ադրբեջանում այդ ցուցանիշը հավասար է 18-ի, Վրաստանում՝ 13-ի, Ռուսաստանում՝ 12,8-ի, Տաջիկստանում՝ 30-ի»,- ասաց Կույումջյանը։

Միաժամանակ նա հայտնեց, որ դեռևս 2-3 տարի առաջ Հայաստանում նույն ցուցանիշը բարձր չէր 10-12-ից, և այդ առումով ներկայիս ցուցանիշը լավն է։

Խոսելով նորածինների սեռերի հարաբերակցության մասին՝ նա հայտնեց, որ 2009 թվականին նորածինների 52 տոկոսը տղաներ են եղել։

Կույումջյանի խոսքերով, 2009 թվականին ավելացել է նաև միայնակ մայրերի թիվը՝ հասնելով 4800-ի՝ 2008 թվականի 4300-ի դիմաց։ -0-