ԵՐԵՎԱՆ, 1 մարտի. /Նովոստի-Արմենիա/. Եվրամիությունն արգելել է ԵՄ երկրներից դեպի Հայաստան վերլուծական սարքավորումների արտահանումը, լրագրողներին ասաց Տեղեկատվական տեխնոլոգիաների ձեռնարկությունների միության (UITE) գործադիր տնօրեն Կարեն Վարդանյանը տեղեկատվական և հեռահաղորդակցական տեխնոլոգիաների ոլորտի առաջնորդների «Առանց փողկապների» հերթական հանդիպման ժամանակ:
«Եվրամիությունը վերլուծական սարքավորումները դիտարկում է որպես երկակի նշանակության ապրանք և այս տեսակետից Հայաստանը համարում է ոչ վստահելի պետություն՝ դասելով նրան աֆրիկյան պետությունների երկրների շարքին», - ասաց Վարդանյանը:
Վերլուծական սարքավորումների թվին են դասվում այնպիսի սարքեր, ինչպիսիք են գազաազդանշանային համակարգերը, բժշկական սարքավորումները, տեխնոլոգիական գործընթացների, ջրի, շարժիչների արտանետումների մակարդակի վերլուծության և մաքրման վերահսկման համակարգերը, տերմոանալիզի համար նախատեսված սարքավորումները, օրգանական ածխածնի անալիզատորները:
Վարդանյանի խոսքերով՝ նման մոտեցումն անընդունելի է Հայաստանի՝ որպես տեղեկատվական և հեռահաղորդակցական տեխնոլոգիաների զարգացած ոլորտ ունեցող երկրի համար:
UITE-ի գործադիր տնօրենը ընդգծեց, որ նման պատժամիջոցը երկակի չափորոշիչների կիառում է:
«Հայաստանին չափազանց անհրաժեշտ է ներկրել վերլուծական սարքավորումներ ՏՏ-ոլորտի զարգացման համար, դա անհրաժեշտ գործիք է», - ավելացրեց Վարդանյանը:
«Ձեռնարկությունների ինկուբատոր» հիմնադրամի (Enterprise Incubator Foundation- EIF) 2009 թվականի «Հայաստանի տեղեկատվական տեխնոլոգիաների ոլորտը. ծրագրային ապահովում և ծառայություններ» զեկույցի համաձայն՝ 2009թ.-ին Հայաստանի ՀՆԱ-ում տեղեկատվական տեխնոլոգիաների ոլորտի մասնաբաժինը կազմել է շուրջ 1.1%: Ուսումնասիրության համաձայն՝ վերջին տասը տարիների ընթացքում ծրագրային ապահովման և ծառայությունների հատվածն արձանագրել է լուրջ աճի տեմպեր` ապահովելով 27% տարեկան աճ:
Ըստ զեկույցի՝ ՏՏ-ոլորտի արտադրած ընդհանուր արտադրանքի շուրջ 55 տոկոսն արտահանվում է ավելի քան 20 երկիր, այդ թվում նաև՝ ԱՄՆ, Եվրոպա և ԱՊՀ: Արտադրանքը, հիմնականում, ներկայացնում է այնպիսի ոլորտներ, ինչպիսիք են ծրագրային ապահովումն ու կիսահաղորդիչների նախագծումը, ծրագրավորման և աութսորսինգի պատվերները, ֆինանսական ծրագրերը, մուլտիմեդիայի նախագծումը, ինտերնետ ծրագրավորումը, վեբ-ծրագրավորումը, տեղեկատվական համակարգերն ու համակարգերի ինտեգրումը:-0-
