ԵՐԵՎԱՆ, 23 փետրվարի. /Նովոստի-Արմենիա/. Հայաստանի Ազգային ժողովի պատգամավորներն առաջարկում են երկրում ստեղծել Լաս Վեգասին նման խաղային գոտի։
«Կարելի է առանձին գոտի առանձնացնել նմանատիպ գործունեության համար, որտեղ բոլորը, ովքեր այնտեղ կբնակվեն, կհասկանան, որ ռիսկային գոտի են ընտրում, իսկ պետությունը պետք է ապահովի ձեռնարկատերերի անկախությունն ու գործունեության անվտանգությունը»,- երեքշաբթի խորհրդարանում հայտարարեց տնտեսական հարցերի մշտական խորհրդարանական հանձնաժողովի անդամ, Դաշնակցության խմբակցության պատգամավոր Արա Նռանյանը։
Հայ խորհրդարանականներն առաջին ընթերցմամբ ընդունել են հարկային օրենսդրության լրացումների փաթեթը շահումով խաղերի և խաղատների գործունեության կարգավորման նպատակով։ Փոփոխություններով առաջարկվում է 2013 թվականի հունվարի 1-ից ավելացնել շահումով խաղերի բազային տուրքի չափը ներկայիս 5 մլն դրամից մինչև 50 մլն դրամի, իսկ խաղատների համար՝ 25 մլն դրամից մինչև 400 մլն դրամի։ Միաժամանակ առաջարկվում է հրաժարվել խաղասեղանների և խաղային ապարատների համար ֆիքսված վճարներից։
Նռանյանը կարծում է, որ օրենքի ներկայիս տարբերակը շատ հարցեր և խնդիրներ է առաջացնում և կարիք ունի լուրջ լրամշակման։
Նրա խոսքերով՝ ներկայիս լրացումները միայն թույլ են տալիս խոշոր բիզնեսին ավելի քիչ հարկեր վճարել, ինչը կհանգեցնի պետբյուջե մուտքերի կրճատմանը և օլիգոպոլիաների ձևավորմանը։
Միաժամանակ, ըստ նրա, խաղային բիզնեսի կազմակերպումը տարածքային ադմինիստրատիվ միավորների սահմաններում կհանգեցնի խաղատան գործունեության դուրս գալուն ֆինանսների նախարարության վերահսկողությունից և կհանձնի այն տեղի «իշխանիկների» ձեռքը, ովքեր վերջնական որոշումներ կընդունեն գործունեության վերաբերյալ և լիցենզիաներ կտրամադրեն։
Փոփոխություններն իրականացվում են «Շահումով խաղերի և խաղատների մասին» Հայաստանի օրենքում փոփոխություն կատարելուն զուգահեռ, որոնց համապատասխան՝ շահումով խաղեր կամ խաղատներ կամ անմիջականորեն (խաղասրահի միջոցով) ինտերնետ շահումով խաղեր 2013թ.-ից կարող են կազմակերպվել միայն Կոտայքի մարզի Ծաղկաձորի համայնքի վարչական սահմաններում, Գեղարքունիքի մարզի Սևան համայնքի վարչական սահմաններում, Վայոց Ձորի մարզի Ջերմուկի համայնքի վարչական սահմաններում։ Դրանով իսկ նախատեսվում է բոլոր խաղատները դուրս բերել Հայաստանի կենտրոնական հատվածից։
2009 թվականին խաղատներից հարկերի և տուրքերի տեսքով պետբյուջե փոխանցվել է 4 մլրդ դրամ (10,5 մլն դոլար)։ -0-
