Հայ-թուրքական հարաբերությունների կարգավորումը ծառայում է Թուրքիայի շահերին, և Հայաստանի շահերն այստեղ հաշվի չեն առնվում, կարծում է պատմաբան Արմեն Կարապետյանը:
«Այս գործընթացը նպատակաուղղված է ողջ աշխարհում Հայոց ցեղասպանության ճանաչման գործընթացը սառեցնելուն», - երկուշաբթի մամուլի ասուլիսի ժամանակ հայտարարեց նա:
Պատմաբանի կարծիքով՝ Թուրքիան կատարեց խորամանկ, դիվանագիտական քայլ՝ ողջ աշխարհում սկսված Ցեղասպանության ճանաչման գործընթացը դադարեցնելու համար:
«Հայաստանի իշխանությունները չպետք է վստահեն Անկարայի, այսպես կոչված, բարի մտադրություններին, քանի որ պատմությունը ցույց է տալիս, որ Թուրքիան դարերի ընթացքում պարբերաբար խախտել է լուրջ միջազգային պայմանագրերը», - ավելացրեց պատմաբանը:
Հայաստանի ու Թուրքիայի արտգործնախարարները հոկտեմբերի 10-ին Ցյուրիխի համալսարանում ստորագրեցին «Դիվանագիտական հարաբերությունների հաստատման մասին արձանագրությունը» և «Երկկողմ հարաբերությունների զարգացման մասին արձանագրությունը»: Փաստաթղթերը ստորագրումից հետո պետք է հավանության արժանանան երկու երկրների խորհրդարանների կողմից:
Հայաստանի և Թուրքիայի միջև չկան դիվանագիտական հարաբերություններ, իսկ 1993-ից, պաշտոնական Անկարայի նախաձեռնությամբ, փակ է հայ-թուրքական սահմանը։
Երկու երկրների միջև բարդ հարաբերությունները պայմանավորված են մի շարք հանգամանքներով, որոնք կապված են, մասնավորապես, Անկարայի՝ ադրբեջանական դիրքորոշման պաշտպանությամբ ղարաբաղյան հարցում, ինչպես նաև Թուրքիայի սուր արձագանքի հետ 1915 թվականին Օսմանյան կայսրությունում Հայոց ցեղասպանության միջազգային ճանաչման հետ կապված։
Հայոց Ցեղասպանությունը ХХ դարի առաջին ցեղասպանությունն է։ Թուրքիան ավանդաբար մերժում է Առաջին համաշխարհային պատերազմի տարիներին մոտ մեկուկես միլիոն հայերի զանգվածային ջարդեր իրականացնելու մեղադրանքները և չափազանց ցավագին է վերաբերվում Հայոց Ցեղասպանության հարցի վերաբերյալ Արևմուտքի կողմից արվող քննադատություններին։
Հայոց ցեղասպանության փաստը ճանաչել են բազմաթիվ երկրներ, մասնավորապես, Ուրուգվայը, Լիտվան, Ռուսաստանը, Ֆրանսիան, Իտալիայի խորհրդարանի ստորին պալատը, ԱՄՆ-ի մեծ թվով նահանգներ, ինչպես նաև Հունաստանի, Կիպրոսի, Արգենտինայի, Բելգիայի, Ուելսի խորհրդարանները, Շվեյցարիայի ազգային խորhուրդը, Կանադայի խորհրդարանի համայնքների պալատը և Լեհաստանի սեյմը։ Հայոց ցեղասպանության զոհերի հիշատակի օրը նշվում է ապրիլի 24-ին:-0-
