ԵՐԵՎԱՆ, 19 փետրվարի./Նովոստի-Արմենիա/. ՀՀ ԱԺ Արտաքին հարաբերությունների մշտական հանձնաժողովը հայկական խորհրդարանի խոսնակ Հովիկ Աբրահամյանին կառաջարկի լիագումար նիստի ժամանակ չքննարկել հայ-թուրքական արձանագրությունները ընդհուպ մինչև դրա եզրակացության հրապարակումը, ուրբաթ հայտնեցին ԱԺ հասարակայնության հետ կապերի վարչությունից:
«Արտաքին հարաբերությունների մշտական հանձնաժողովը ուրբաթ նիստի ժամանակ որոշեց դիմել ԱԺ նախագահ Հովիկ Աբրահամյանին` հայ-թուրքական արձանագրությունների քննարկումը խորհրդարանի լիագումար նիստում կազմակերպել գլխադասային` ԱԺ արտաքին հարաբերությունների եզրակացությունն ունենալուց հետո միայն: Հանձնաժողովի որոշմամբ ստեղծվեց 5 հոգուց բաղկացած աշխատանքային խումբ, որը մեկ շաբաթվա ընթացքում պետք է ներկայացնի իր դիրքորոշումը քննարկումների անցկացման ձևի վերաբերյալ»,- ասվում է հաղորդագրության մեջ:
Հանձնաժողովի նիստին հանձնաժողովի նախագահ Ռուստամյանը տեղեկացրեց, որ ԱԺ կանոնակարգի համաձայն, միջազգային պայմանագրերն ավտոմատ կերպով ընդգրկվում են ԱԺ նստաշրջանի, ինչպես նաև` քառօրյա նիստերի օրակարգերի նախագծերում: Նա առաջարկեց դիմել ԱԺ նախագահ Հովիկ Աբրահամյանին` հայ-թուրքական արձանագրությունների քննարկումը խորհրդարանի լիագումար նիստում կազմակերպել գլխադասային` ԱԺ արտաքին հարաբերությունների եզրակացությունն ունենալուց հետո միայն:
Հանձնաժողովի անդամ Ստեփան Սաֆարյանը իրազեկեց, որ «Ժառանգություն» խմբակցությունը ԱԺ մշտական բոլոր հանձնաժողովներին գրությամբ առաջարկել է մեկ անգամ ևս անցկացնել խորհրդարանական քննարկումներ հայ-թուրքական արձանագրությունների վերաբերյալ:
«Խորհրդարանական լսումների անցկացման վերաբերյալ ԱԺ խմբակցությունները մինչև փետրվարի 22-ը հանձնաժողովին պետք է ներկայացնեն իրենց տեսակետները»,- ասվում է հաղորդագրության մեջ:
Հայաստանի և Թուրքիայի՝ մինչև վերջին ժամանակները բավականին լարված հարաբերությունները սկսեցին կարգավորվել, երբ երկու երկրի արտգործնախարարներ Էդվարդ Նալբանդյանն ու Ահմեդ Դավութօղլուն հոկտեմբերի 10-ին Ցյուրիխի համալսարանում ստորագրեցին «Դիվանագիտական հարաբերությունների հաստատման մասին արձանագրությունը» և «Երկկողմ հարաբերությունների զարգացման մասին արձանագրությունը»: Փաստաթղթերը ստորագրումից հետո պետք է հավանության արժանանան երկու երկրների խորհրդարանների կողմից:
Հայաստանի և Թուրքիայի միջև չկան դիվանագիտական հարաբերություններ, իսկ 1993-ից, պաշտոնական Անկարայի նախաձեռնությամբ, փակ է հայ-թուրքական սահմանը։ Հարաբերությունները բարդացան, երբ Անկարան սկսեց սատարել ադրբեջանական դիրքորոշմանը՝ ղարաբաղյան հարցում, և երբ Թուրքիան կտրուկ արձագանքեց Օսմանյան կայսրությունում 1915թ. հայոց ցեղասպանության միջազգային ճանաչման գործընթացին:-0-
