«Արարատ» ապրանքանիշը 2010 թվականի մայիսի վերջին կսկսի «Լեգենդներն այսօր» շարքի երկրորդ ֆիլմի նկարահանումները, «Նովոստի-Արմենիա» գործակալությանը տված բացառիկ հարցազրույցում հայտնեց ԵԿԳ գործադիր տնօրեն Արա Գրիգորյանը։
«Ամենայն հավանականությամբ, մայիսի վերջին կսկսվեն «Լեգենդներն այսօր» շարքի երկրորդ ֆիլմի նկարահանումները։ Ընտրությունից հետո մենք արդեն ունենք երկու լեգենդից բաղկացած short-list»,- ասաց Գրիգորյանը, պարզաբանելով, որ յուրաքանչյուր լեգենդի մասին ֆիլմ կնկարահանվի։ Գրիգորյանի խոսքերով, նախատեսվում է շարունակել հայկական լեգենդների շարքը և հինգ ֆիլմ նկարահանել։
ԵԿԳ ղեկավարը հայտնեց, որ ենթադրաբար ապրիլի սկզբին մեկնարկում է արդեն նկարահանված «Ախթամար» ֆիլմի հետ կապված եզրափակիչ փուլը, իսկ ապրիլ-մայիսին կսկսվի DVD լայնածավալ քարոզչություն։
Մասնավորապես, Գրիգորյանը նշեց, որ Ռուսաստանում որպես բոնուս DVD-սկավառակներ կտրվեն «Արարատ» կոնյակի գնորդներին։ Այսպես, «Նաիրի» և «Տոնական» կոնյակի յուրաքանչյուր գնորդ սկավառակ կստանա։ DVD կստանան նաև «Արարատի» կոնյակների երկու և ավելի շիշ գնելու դեպքում։
«Մենք ցանկանում ենք, որպեսզի յուրաքանչյուր ընտանիքում «Ախթամարի» սկավառակ լինի, որն այսօր մեծ արձագանք ունի Ռուսաստանում»,- ասաց նա։
Կոնյակի «Արարատ» ապրանքանիշը 2009 թվականի վերջին սկսել է «Լեգենդներն այսօր» շարքը՝ հայկական ավանդությունների ժամանակակից մեկնաբանությունը։
Շարքի առաջին ֆիլմը դարձավ «Ախթամար» գեղարվեստական ֆիլմը՝ «Լեգենդներն այսօր» շարքի առաջին նախագիծը, որով «Արարատ» ապրանքանիշը սկսում է հնագույն հայկական ավանդությունների վերածնունդը ժամանակակից ներկայացմամբ։
«Ֆիլմի ստեղծողներ Շամմասյան եղբայրները (երիտասարդ ռեժիսորներ անվանակարգում Կաննի առյուծների մրցանակակիրներ) 15 րոպե էկրանային ժամանակում տեղավորել են սիրո, լեգենդի դարավոր իմաստության ու մարդու հավիտենական հույզերի երեք պատմություն: Հին հայկական լեգենդին նոր հայացք է ապահովել կինոյի լեգենդ Արմեն Ջիգարխանյանի և ռուսական ժամանակակից էկրանի երիտասարդ դերասաններ Գրիգորի Դոբրիգինի ու Ռավշանա Կուրկովայի տանդեմը»։
Երևանի կոնյակի գործարանը հիմնվել է 1887 թվականին։ Ժամանակակից գործարանային համալիրը գոյություն ունի 1953 թվականից։ 1998 թվականի հունիսին ԵԿԳ-ն ընդգրկվել է Պեռնո Ռիկար (Pernod Ricard) միջազգային կորպորացիայի կազմում, որը մի շարք ոգելից խմիչքների հայտնի ապրանքատեսակների սեփականատեր է և աշխարհում ոգելից խմիչքի արտադրության և վաճառքի ցուցանիշով երկրորդ տեղն է զբաղեցնում։ Պեռնո Ռիկար ընկերությունը ձեռք է բերել ԵԿԳ-ն միջազգային մրցույթում՝ 30 մլն ԱՄՆ դոլարով։ -0-
